Nesër Veliaj në SPAK, Kalemaj: Gjuha e përdorur nga kryebashkiaku ndaj Prokurorisë së Posaçme, përpjekje për shantazh (VIDEO)

Kryebashkiaku i Tiranës, Erion Veliaj do të shkojë pranë ambienteve të SPAK ditën e nesërme pasi është thirrur nga organi i akuzës si person në dijeni për aferën 5D.

Politologu Ilir Kalemaj tha në studion e MCN Live tha se sipas qëndrimeve zyrtare të Rithemelimit  kjo është thirrja e tretë për kryebashkiakun e Tiranës.

Duke vijuar më tej, Kalemaj tha se ishte një autogol gjuha e përdorur nga ana e Veliajt ndaj SPAK-ut dhe BKH-së, duke përmendur godinën ku këto struktura punojnë pasi mund të merret si përpjekje për miklim apo shantazhim.

Kam ndjekur qëndrimet zyrtare të Rithemelimit, të Këlliçit i cili ka thënë se Veliajt, sipas informacioneve që ata kanë i ka shkuar ftesa e parë për në SPAK pikërisht pas skandalit që goditi drejtorët e përgjithshëm në Bashkinë e Tiranës, por ishte dita që pati një operim, probleme me shëndetin. Pastaj pati një ftesë të dytë për të shkuar, por qëlloi që ishte Bajram. Veliaj duket që e ndihmon dhe fati në këto raste. Ftesa e tretë që i ka ardhur nga SPAK-u së paku sipas opozitës dhe burime mediatike  bëri që ai të dilte publikisht dhe të thoshte po shkoj unë te SPAK-u me një dosje të madhe, nuk është se më kanë thirrur  dhe nga ana tjetër i kanë dhuruar SPAK-ut dhe BKH-së një godinë që të punojnë të qetë dhe të pandikuar në punën e tyre. Nuk e di pse e përmendi këtë gjë, a thua ishte dhuratë personale që ai i bëri organeve të drejtësisë, por edhe nëse do të ishte do të ishte ndikim i paligjshëm, se bëhet fjalë për një çështje që ai merret të paktën si person në dijeni. Pastaj se çfarë do nxjerrin hetimet. Mënyra si e tha mendoj se bëri autogol. Është ose përpjekje për miklim, ose përpjekje për shantazhim, gjuha që ai përdori ndaj SPAK-ut.

Ai është thirrur  për të deponuar për dijeninë që ai ka për faktin që drejtorët e tij janë të involuar për aferën 5 D ku janë shpërdoruar 30 milionë euro.