Qindra banorë të Himarës, peticion Gjykatës Kushtetuese: Të gjykohet sa më parë çështja “Beleri”! Komunitetit i është bërë padrejtësi

197 banorë të bashkisë së Himarës i janë drejtuar përmes një peticioni Gjykatës Kushtetuese , ku kërkojnë gjykimin sa më parë të çështjes “Beleri”. 

Ata shprehen se si votues dhe njëkohësisht edhe si banorë të Himarës, “kërkojnë që të vendoset në vend një padrejtësi që i është bërë komunitetit, duke u arrestuar kryetari të cilin ata e zgjodhën dhe e mbështetën me vote”.

Banorët i kërkojnë gjykatës kushtetuese që edhe bashkia e Himarës të kthehet në normalitet si çdo bashki tjetër e vendit, dhe të ushtrojë në të detyrën personi i cili doli fitues i kësaj bashkie me votat e banorëve të zonës. Ata theksojnë se zgjatja në kohë e cështjes vendos në dyshim demokracinë, dhe mbi të gjitha vullnetin e një komuniteti.

Peticioni mbyllet duke u kërkuar gjyqtarëve të Kushtetueses që “të dëgjohet fjala e popullit dhe Kushtetuta”.  

Kujtjojmë që në Gjykatën e Apelit të Posaçëm është shtyrë seanca për kryebashkiakun e zgjedhur të Himarës Fredi Beleri, i cili ka kërkuar leje për t’u betuar.

Beleri apeloi vendimin e Shkallës së Parë, që e rrëzoi kërkesën e tij. Beleri u arrestua dy ditë para zgjedhjeve të 14 majit pas dyshimeve për korrupsion zgjedhor.

Deri më sot ai s'ka mundur të marrë detyrën e kryebashkiakut të Himarës, pasi nuk ka marrë leje për betimin nga gjykata. 

Kjo çështje është bërë temë kryesore edhe në marrëdhëniet mes Tiranës dhe Athinës.