Kryetari i PD, Lulzim Basha në një aktivitet të organizuar nga FRPD, në kuadër të 30 vjetorit të "Lëvizjes Studentore", mblodhi sot virtualisht të rinjtë nga Kosova, Maqedonia e Veriut, Lugina e Preshevës, nga Mali i zi dhe mbarë diaspora.
Para të rinjve në takimin virtual, Basha tha se ndryshimi që do të vijë do të ketë vulën e tyre.
“Mezi po pres ditën kur qeveria e dalë nga votat e 25 prillit të marrë përgjegjësitë, të mundë virusin dhe betejat e tjera për të mposhtur varfërinë. Më lejoni tu jap një përqafim virtual. Jam i gëzuar që këtu janë bashkuar me ne edhe të rinjtë nga Kosova, Maqedonia, Presheva e Diaspora dhe dua ti përshëndes me mall. Ky komunikim mbarëkombëtar ishte vetëm një vegim, sot është realitet. 30 vite më parë ne bëmë kthesën e madhe. Kjo u bë falë të rinjve të dhjetorit që u shkon sot mirënjohja. Kauza e këtij ndryshimi u bë e mundur vetëm prej të rinjve idealistë. Populli shqiptar ka një histori të dhimbshme, por në këtë histori nuk ka ndodhur asnjë ngjarje e lavdishme pa protagonizmin e të rinjve. Sot në këto ditë të shkurtra dhe të errëta të dhjetorit, ky mesazh vlen dhe duhet të kujtohet më fuqishëm. Ndryshimi i Shqipërisë do të vijë dhe do të bëhet vetëm nga rinia shqiptare.
Kam udhëtuar anembanë Shqipërisë. Kam takuar të rinj të talentuar. U bënë 8 vite që Shqipëria ka dalë nga shinat, kostoja e jetës sa vjen e rritet, si pasojë e keqqeverisjes shumë shqiptarë kanë humbur vendet e punës dhe shpresën. Kjo është arsyeja që shumica e të rinjve mendojnë të largohen nga vendi. Shumë e kanë hedhur hapin, shumë të tjerë e mendojnë si mundësinë e vetme emigracionin. E kuptoj dhe e ndjej dëshpërimin tuaj, kur shikoni propagandën virtuale dhe pastaj përjetoni me sytë e tuaj realitetin. E dëgjoj tek thoni kështu paska qenë e shkruar për ne”, tha Basha.
Basha u shpreh i përkushtuar se prej tetë vitesh Shqipëria ka dalë nga drejtimi i duhur, ka bërë hapa pas, dhe si e tillë, do të punjnë fort për të bërë ndryshimin me ndihmën e rinisë shqiptare.
“E kuptoj dhe e ndjej dëshpërimin tuaj, kur shikoni propagandën virtuale dhe pastaj përjetoni me sytë e tuaj realitetin. Dikujt i leverdis që të mbjellë ndjenjat e dorëzimit, pesimizmit dhe braktisjes të vendit.
Në Shqipëri keqqeverisja i detyron të largohen e të braktisin vendin. Unë besoj me shpirt se ndryshimi i shumëpritur është i mundur. Vetëm me përfshirjen e rinisë, ndryshuam ekonominë nga ekonomia e centralizuar komuniste në një ekonomi të lirë të tregut. Ndryshimi do të mbajë përsëri firmën dhe vulën e rinisë shqiptare” u shpreh Basha.
Basha në këtë takim me të rinjtë, premtoi se kufizimi i mandatit të postit të kryeministrit do të bëhet në dy mandate.
"Do kufizoj mandatin e kryeministrit dhe ju do votoni që të qarkulloni elitat. Pse duhet të kemi pushtet të përjetshëm. Posti i kryeministrit do kufizohet në dy mandate. Do pastrojmë "ujin e ndotur" të politikës.
Modeli i qeverisjes tregohet që në fillim. Atë që nuk e arrin dot për 8 vjet nuk e arrin dot as 80 vjet. Kur nuk mban asnjë premtim për 8 vjet çfarë mund të japë më shumë një njeri pas 8 vjetësh në pushtet. Në parlament apo me referendum unë do të bëj realitet kufizimin e mandatit të kryeministrit”, premtoi Basha.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
