Avni Metra, 53 vjç, u kap në Borehamwood në Hertfordshire, ku ka jetuar i fshehur për 18 vjet. Ai u dënua në mungesë në Shqipëri për dy vrasje dhe mbajtje pa leje të armëve të zjarrit. Sipas ligjit shqiptar, Avni Metra ka të drejtë për një rigjykim, por ai u tha gjyqtarëve në Westminster, se nuk pret të marrë një gjykim të drejtë në Shqipëri.
Duke folur përmes një përkthyesi, Metra deklaroi se ai u arratis nga vendi, pasi "një mik në polici i kishte thënë të largohej, përndryshe do ta vrisnin njerëz nga qeveria apo dikush tjetër ". Metra Hyri në Mbretërinë e Bashkuar në fund të vitit 1990, duke u maskuar si një azilkërkues kosovar me emrin Abdul Mekra. Identiteti i tij u zbulua me anë të një investigimi nga gazeta Daily Mail. Duke pretenduar të drejtën e tij për një jetë familjare në Britani të Madhe, ekipi i tij i avokatëve i deklaroi gjykatës se ai nuk ka besim tek gjykata shqiptare. Metra u shpreh se është provuar që ka korrupsion në gjykatat në Shqipëri. Metra ka edhe një precedent tjetër.
Në 2011 është larguar nga familja e tij, pasi u dënua për sulm ndaj gruas së tij dhe gjykata vendosi se ai mund të ketë vetëm kontakt të kufizuar me fëmijët e tij. Sipas avokatit, nëse ekstradohet në Shqipëri, klienti i tij nuk do të mundet të takojë fëmijët. Metra, i cili mbahet në paraburgim, do të mësojë nëse do të ekstradohet apo jo në Shqipëri më 19 gusht.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
