Anëtarët evropianë të NATO-s kanë ngritur shqetësime se afrimi i Uashingtonit me Moskën dhe mënjanimi i BE-së gjatë bisedimeve mund të dobësojë bllokun ushtarak të udhëhequr nga SHBA, raporton AFP në një artikull ku citon diplomatë perëndimorë.
SHBA dhe Rusia kanë mbajtur disa takime të nivelit të lartë në Arabinë Saudite dhe Turqi, me qëllim përfundimin e konfliktit në Ukrainë dhe përmirësimin e marrëdhënieve diplomatike, ndërkohë që pritet një tjetër raund bisedimesh.
Në një raport të botuar të mërkurën, diplomatë të paidentifikuar të NATO-s thanë se sinjalet nga Uashingtoni se mund të largojë forcat e saj nga Evropa, bashkë me afrimin e Presidentit të SHBA Donald Trump me Rusinë, kanë ngjallur frikë midis shteteve anëtare.
"Ne e dimë drejtimin: Më pak SHBA në aleancë," i tha AFP një diplomat i NATO-s, duke shtuar se: “Interesi ynë është të mbajmë maksimalisht SHBA-të në aleancë”.
Vendet e BE-së kanë rritur shpenzimet ushtarake dhe prodhimin e armëve, të nxitura nga kërkesa e Trump për më shumë se dyfishimin e objektivit të shpenzimeve të NATO-s në 5% të PBB-së së tyre përkatëse.
“Ne gjithmonë e dinim se do të vinte momenti kur Amerika do të bënte hapa pas”, shprehet ish-zyrtari i NATO-s Jamie Shea. SHBA-ja duhet të paraqesë një afat kohor të qartë nëse planifikon të zvogëlojë praninë e saj ushtarake në Evropë, thanë diplomatët.
Anëtarët evropianë të NATO-s i shohin bisedimet e vazhdueshme SHBA-Rusi si një kërcënim potencialisht thelbësor për bllokun. Për momentin, diplomatët shpresojnë se kontakti i Trump me Moskën është një veprim taktik që synon të sigurojë një marrëveshje për t'i dhënë fund armiqësive.
"Nëse është një ndryshim strategjik, atëherë sigurisht që është një problem i madh," tha një nga diplomatët. "Niveli i optimizmit sigurisht që po bie," shtoi një tjetër.
Trump komentoi së fundmi se zgjerimi i NATO-s dhe shtrirja e saj në Ukrainë gjatë kohës së ish-presidentit amerikan Joe Biden në Shtëpinë e Bardhë ishin ndër faktorët që çuan në konfliktin me Rusinë
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
