Basha, kryedemokrati i pestë që largohet nga drejtimi i PD-së

Lulzim Basha, zyrtarisht u bë kryetari i pestë i PD-së që jep dorëheqjen.

Basha udhëhoqi këtë forcë politike nga 15 shtatori i vitit 2013 deri më 21 mars të vitit 2022.

Jetëgjatësia politike në krye të demokratëve, e vendos Bashën, pas Sali Berishës, i cili drejtoi selinë blu për 17 vjet radhazi.  

Berisha u zgjodh si kryetar i parë i PD-së, duke mos përfshirë drejtimin gati dy mujor të Azem Hajdarit.

Me krijimin e PD-së si forcë politike u krijua një komision nismëtar, kryetar i së cilit ishte Hajdari.

Më 13 shkurt të vitit 1991, Berisha u zgjodh kryetar i Komitetit Drejtues të PD-së.

Në zgjedhjet e 22 marsit të vitit 1992, PD-ja fitoi gjerësisht në të gjithë Shqipërinë, me 92 ulëse.

Më 9 prill të po atij viti, me 96 vota pro dhe 35 kundër, Berisha u zgjodh president i ri i vendit.

Eduard Selami, i cili deri në atë kohë mbante postin e sekretarit të Përgjithshëm të PD-së, do të pasonte Berishën.

Në Kuvendin e Dytë të PD-së që u mbajt më 4 dhjetor të vitit 1993, Selami u rizgjodh në postin e kryetarit.

Drejtimi i Selamit do të vijonte deri në mars të vitit 1995.

I treti që do të pasonte kryesimin e PD-së pas Selamit ishte Tritan Shehu.

Më 4 prill të vitit 1996 do të mbaheshin punimet e Kuvendit të Tretë të Partisë Demokratike.

Kuvendi do të zgjidhte Shehun në garën me Ferdinand Xhaferrin.

Kryetari i tretë i PD-së do udhëhiqte alternativën demokrate në zgjedhjet parlamentare dhe lokale të vitit 1996 dhe parlamentaret e vitit 1997.

Më 20-21 tetor të vitit 1997 u mbajt Kuvendi i Katërt i Partisë Demokratike.

Sali Berisha do të zgjidhej sërish si kryetar i PD-së, në një garë me ish-kryeparlamentarin Pjetër Arbnori.

Këtë post ish-kryeministri e mbajti deri në zgjedhjet e 23 qershorit 2013.

Humbja e zgjedhjeve të përgjithshme në vitin 2013, do të sillte edhe rokadën e kryesimit të partisë me largimin e Sali Berishës.

Basha do të zgjidhej me një koncept të ri për strukturat e kohës dhe jo vetëm, një anëtar një votë.

Me 80% të votave karshi kandidatit tjetër Sokol Olldashi, Basha do të fitonte kreun e partisë.

Me daljen e kryedemokratit nga skena, selia blu pritet të hyjë në një fazë të re ringritjeje ose rindërtimi.

Deri në zgjedhjen e kryetarit të ri, duhet të presim pas zgjedhjeve lokale të vitit 2023.