Dialogu me Greqinë dhe marrëveshjet e mundshme mes dy vendeve ishin tema kryesore e një interpelance të mbajtur sot me ministrin e Jashtëm, Ditmir Bushati, përmes videokonferencës së Platformës së Bashkëqeverisjes, me një grup studentësh të ekselencës. I pyetur në lidhje me çështjen e shumëdebatuar të kufijve detarë mes dy shteteve, Bushati tha se marrëveshja e re do të jetë më e favorshme se ajo e vitit 2009.
“Pyetja është sa fitojmë dhe sa humbim. Bazuar në vijat e kuqe që ne kemi hequr nga e drejta ndërkombëtare apo vendimi i Gjykatës Kushtetuese, mund t’u garantojmë se marrëveshja e re me Greqinë do të jetë më e favorshme se ajo e 2009-s. Do të jetë e ndershme dhe e zbatueshme. Çdo diskutim tjetër është thjesht dhe vetëm shpifje dhe mungesë e plotë informacioni, qoftë sa i përket zonës naftëmbajtëse dhe gazmbajtëse”, tha ai.
Ndërsa në lidhje me heqjen e ligjit të luftës, Bushati tha se nuk do të përsëriten gabimet e së shkuarës.
“Do të qepim regjimin kufitar det-tokë, për të pasur mundësi të sfidojmë frikërat e atyre që propagandojnë politikat irredentiste. Sa i përket kuadrit kohor për shfuqizimin e ligjit të luftës, në vitin 1987, qeveria Papandreu bëri një përçapje të parë për ta shfuqizuar. Qeveria Rama do ta deklarojë heqjen e ligjt të luftës vetëm kur kjo të materializohet në një akt të vlefshëm në përputhje me ligjin grek”, tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
