Policia e Vlorës ka vënë në pranga një 28-vjeçar, banues në Panaja, i cili theu masën e sigurisë "arrest në shtëpi" dhe, pas një konflikti për motive ende të paqarta, plagosi me thikë një 34-vjeçar dhe i dëmtoi automjetin.
Ngjarja ndodhi në fshatin Panaja, ku ndërhyrja e shpejtë e shërbimeve të Komisariatit të Policisë Vlorë parandaloi përshkallëzimin e konfliktit që mund të kishte pasur pasoja më të rënda.
I arrestuari, shtetasi K. B., 28 vjeç, kishte thyer masën e sigurisë të caktuar më herët nga Gjykata për veprat penale “Plagosje e rëndë me dashje” dhe “Shkatërrim prone”.
Nga hetimet paraprake, dyshohet se K. B. goditi me thikë shtetasin B. B. (H.), 34 vjeç, dhe i shkaktoi dëme automjetit të këtij të fundit.
Më pas, viktima e plagosur ka shkuar në banesën e autorit dhe e ka kanosur me një armë gjahu që e mbante pa leje, si dhe i ka dëmtuar automjetin.
Shtetasi B. B. është proceduar penalisht në gjendje të lirë dhe arma e gjahut e përdorur për kanosje është sekuestruar nga Policia. Ai ka marrë ndihmën mjekësore dhe ndodhet jashtë rrezikut për jetën.
Materialet procedurale i janë referuar Prokurorisë pranë Gjykatës së Shkallës së Parë Vlorë për veprime të mëtejshme hetimore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
