Policia e Tiranës thotë se pas hetimeve tre mujore, u kurorëzua operacioni policor i koduar “Transferta”, gjatë të cilit u caktuan 15 masa sigurie për po aq persona, të dyshuar se mashtronin qytetarët e Bashkimit Europian, nëpërmjet 15 subjekteve Call center, për të bërë transferta parash drejt Shqipërisë, me vlerë totale rreth 5 milionë euro.
Specialistët e Sektorit për Hetimin e Krimeve Ekonomiko-Financiare, të DVP Tiranë, në vijim të operacioneve të njëpasnjëshme për goditjen e veprimtarive kriminale të kryera nëpërmjet subjekteve call center, mbështetur nga inteligjenca informative, në bashkëpunim me Hetimin Tatimor, referuan materialet në Prokurorinë pranë Gjykatës së Rrethit Gjyqësor Tiranë, e cila regjistroi procedimin penal për veprën penale “Pastrimi i produkteve të veprës penale ose veprimtarisë kriminale”.
Bazuar në provat e siguruara nga hetimi tremujor, me metoda speciale, Gjykata e Rrethit Gjyqësor Tiranë, caktoi masën e sigurisë “Arrest në burg”, për 15 shtetas, nga të cilët 9 shtetas italianë dhe 6 shtetas shqiptarë.
Në zbatim të vendimit të Gjykatës për ekzekutimin e masave të sigurisë, si rezultat i verifikimeve të kryera në sistemin TIMS, nga specialistët për Hetimin e Krimeve Ekonomiko-Financiare, të DVP Tiranë, ka rezultuar se 9 shtetasit italianë dhe 1 shtetas shqiptar, nuk ndodhen në Shqipëri.
Ndërkohë, nga kontrollet e kryera në banesat e shtetasve shqiptarë, ndaj të cilëve Gjykata e Tiranës ka caktuar masa sigurie, shërbimet e policisë kapën dhe ndaluan shtetasin A. L., 30 vjeç, banues në Tiranë.
Aktualisht vijojnë kontrollet intensive për kapjen e 4 shtetasve të tjerë shqiptarë, ndaj të cilëve është caktuar masa e sigurisë “Arrest në burg”.
Gjithashtu, po bashkëpunohet edhe me homologët italianë, për kapjen e 9 shtetasve italianë dhe të një shtetasi shqiptar, autorë të dyshuar për këtë veprimtari kriminale, ndaj të cilëve është caktuar masa e sigurisë “Arrest në burg”.
Policia thotë se me qëllim ruajtjen e konfidencialitetit të hetimit, nuk mund të bëhen të ditura gjeneralitetet e shtetasve ndaj të cilëve janë caktuar masa sigurie, teksa operacioni vijon.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
