Gjykata Kushtetuese e Republikës së Shqipërisë ka shfuqizuar vendimin e Gjykatës së Lartë të Republikës së Shqipërisë dhe ka urdhëruar rikthimin për rishqyrtim të çështjes së kryebashkiakut Erion Veliaj për masën e sigurisë.
Sipas vendimit të Gjykatës Kushtetuese, Gjykata e Lartë nuk ka ushtruar një kontroll kushtetues efektiv mbi masën e sigurisë të vendosur ndaj Veliajt. Në arsyetimin e saj, Gjykata vlerëson se nuk është analizuar proporcionaliteti i masës në raport me funksionin publik të ushtruar nga kërkuesi, nuk janë shqyrtuar në mënyrë konkrete alternativat ndaj paraburgimit dhe nuk është dhënë një vlerësim kushtetues për ndikimin e kësaj mase mbi ushtrimin e mandatit të fituar me votën e qytetarëve, si dhe mbi të drejtën e qytetarëve për t'u përfaqësuar nga i zgjedhuri i tyre.
Ky është vendimi i dytë i Gjykatës Kushtetuese në lidhje me çështjen e Veliajt. Më herët, ajo kishte konstatuar cenimin e standardeve kushtetuese në raport me shkarkimin nga detyra të Kryetarit të Bashkisë së Tiranës.
Vendimi konsiderohet me rëndësi për standardet kushtetuese që lidhen me kufizimin e lirisë personale, veçanërisht në rastet kur bëhet fjalë për funksione publike të fituara përmes zgjedhjeve.
Pas këtij vendimi, çështja i rikthehet Gjykatës së Lartë, e cila pritet ta shqyrtojë sërish masën e sigurisë në përputhje me standardet kushtetuese të përcaktuara nga Gjykata Kushtetuese.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
