Kreu i Shtetit, Ilir Meta foli sërish sot për situatën politike në vend. I pyetur nga mediat për rrezikun e përplasjeje civile në vend në kushtet kur asnjëra nga palët politike nuk po tërhiqet nga qëndrimet e saj, Meta u dërgoi një mesazh publikisht liderëve politik të vendit. Ai u bëri thirrje atyre që t’i thërrasin mendjes dhe të marrin përgjegjësitë e tyre.
“Kjo situatë nuk duhet të ekzistonte mbas 22 vitesh pas ’97 që ishte një vit mjaft fatkeq. Të gjithë t’i thërrasin mendjes dhe të marrin përgjegjësitë e tyre. Për interesa tërësisht egoiste dhe okulte Shqipëria nuk ka pse të shkojë në konfrontim dhe as shqiptarët, ata e kanë vendosur të bashkëjetojnë në mënyrë demokratike dhe të jenë ndarë me sistemet përjashtuese që në vitet 1990”, tha Meta.
Meta foli edhe për transferimin e përgjegjësive nga njëra palë tek tjetra.
“Askush nuk mund t'i transferojë përgjegjësitë te të tjerët, aq më tepër te presidenti. Ata e dinë shumë mirë se çfarë duhet të bëjnë dhe pasojat që do të kenë në rast se vendin e çojnë drejt konfrontimit”, tha prerazi presidenti Meta.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
