Zonja e Parë e Sirisë po përballet me kancerin në gji. Një foto e postuar në faqen zyrtare në “Facebook” e tregon presidentin sirian, Bashar al-Assad në krah të së shoqes, në një spital, ku ajo i është nënshtruar kimioterapisë për një tumor në fazat fillestare.
Në mesazhin që shoqëron foton, Assad thotë se një tumor malinj është zbuluar në fazën fillestare te Zonja e Parë dhe ai i uron shërim të shpejtë.
Njoftime të tilla publike janë të pazakonta në botën arabe, ku kanceri konsiderohet tabu.
Prindërit e Asma Assad janë me origjinë nga provinca e Homsit, por vetë ajo ka lindur dhe është rritur në Londër, për t’u vendosur më pas në Siri pas njohjes me Bashar al-Assad.
Çifi ka 18 vjet martesë dhe tre fëmijë: Hafez, Zein dhe Karim.
Një ish-bankiere, Asma e ka portretizuar veten si ana moderne e dinastisë Assad. Në vitet e para që pasuan kryengritjet në Siri, ajo nuk është shfaqur shpesh në publik, por gjatë dy viteve të fundit ka qenë shumë aktive. Ajo i ka mbështetur gjithnjë politikat e të shoqit, pavarësisht kritikave të ashpra ndërkombëtare. Asma i ka cilësuar “propagandë” thirrjet për ta çuar të shoqin para drejtësisë si kriminel lufte.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
