Arabia Saudite emëron ambasadoren e parë grua

Një dekret mbretëror i lëshuar nga Princi i Kurorës, Mohammed bin Salman, në rolin e tij si zëvendës i mbretit, emëron princeshën Reema bint Bandar bin Sultan al-Saud si ambasadore e Arabisë Saudite në Shtetet e Bashkuara. Kjo e bën atë ambasadoren e parë femër të mbretërisë.

Princesha Reema është vajza e princit Bandar bin Sultan, i cili gjithashtu ka shërbyer si ambasador i Arabisë Saudite në SHBA nga viti 1983 deri në vitin 2005. Princi Bandar ka mbajtur më parë postin e sekretarit të përgjithshëm të Këshillit Kombëtar të Sigurisë të Arabisë Saudite dhe gjithashtu ka shërbyer si drejtor i Përgjithshëm i Inteligjencës.

Emërimi i Reema-s u përshëndet nga shumë njerëz si një hap i madh për Mbretërinë, përfshirë ambasadorin e Arabisë Saudite në Rusi, dr. Rayed Krimly.

"Ambasadorja e parë saudite është gruaja e duhur në vendin e duhur. Ajo është personi më i mirë për të përfaqësuar aspiratat dhe gjallërinë e vizionit tonë rinor në Uashington", tha ambasadori Krimly për Al Arabiya English.

E diplomuar në universitetin “Xhorxh Uashington” në Uashington, ajo ka qenë aktive në sektorin publik dhe privat të Arabisë Saudite dhe ka pasur rol aktiv në fuqizimin e gruas.

Në 2013, princesha themeloi Alf Khair, një ndërmarrje sociale me një mision për të siguruar akses për gratë saudite duke ofruar udhëzime dhe menaxhim profesional.

Në vitin 2016, Princesha Reema u emërua nënsekretare e Divizionit të Grave në Autoritetin e Sportit të Përgjithshëm të Arabisë Saudite. Një vit më vonë, ajo u bë Presidentja e Federatës Saudite për Sportet e Komunitetit, duke u bërë gruajae parë që udhëheq një federatë që mbulon aktivitetet sportive për burrat dhe gratë në Mbretërinë Saudite. Para se të emërohej si ambasadore e në SHBA, ajo ishte zëvendëspresidente për Zhvillim dhe Planifikim në Autoritetin e Sportit të Përgjithshëm të Arabe Saudite.