Ja kur mund të arrestohet Saimir Tahiri

Pasi prokuroria lëshoi kërkesën drejtuar Kuvendit për heqjen e mandatit të deputetit Saimir Tahiri, që do hapte rrugë veprimeve të prokurorisë, kreu i parlamentit Gramoz Ruçi do të mbledh këshillin e rregullores, mandateve dhe imunitetit. Kjo bledhje do të përcaktojë nëse kërkesa e prokurorisë do shkojë drejt parlamentit që do të pasonte me votimin e fshehtë të deputetëve. Sipas proçedurës deputeti për të cilin mblidhet këshilli i rregullores në këtë rast Saimir Tahiri,  njoftohet për kërkesën e bërë dhe dokumentet që e shoqërojnë atë, si dhe i bëhet e ditur koha kur do të mbahet mbledhja. Deputeti ka të drejtë të paraqesë në Këshill, me shkrim ose me gojë, shpjegimet dhe vërejtjet e tij rreth çështjes. Këshilli i rregullores i cili përbëhet nga 10 anëtarë, 5 nga opozita dhe 5 nga mazhoranca përbëhet nga:  Gramoz Ruçi, Klotilda Bushka, Bledar Çuçi, Vasilika Hysi, Ulsi Manja, Eduard Halimi, Gent Strazimiri, Enkelejd Alibeaj, Nasip Naço  dhe Dhurata Çupi.

Në përfundim të shqyrtimit, Këshilli, brenda 4 javëve, duhet të hartojë një raport që do ti bëhet i njohur të gjithë deputetëve në seancë plenare,  në të cilin rekomandon rrëzimin ose miratimin e dhënies së autorizimit për fillimin e ndjekjes penale ndaj deputetit. Shqyrtimi i kërkesës për dhënien e autorizimit për fillimin te ndjekjes penale ose arrestimin e një deputeti vendoset si pikë e parë e rendit të ditës të seancës pasardhëse, e cila parashikohet për ditën e mërkurën, në 25 tetor. Në nisje të seancës i jepet fjala deputetit për të cilin është paraqitur kërkesa për të dhënë shpjegime ose për t’iu përgjigjur pyetjeve të deputetëve. Deri në votimin e parlamentit, Tahiri nuk mund të arrestohet.