Gjykata në New York: Donald Trump ka mashtruar

Ish-presidenti i Shteteve të Bashkuara të Amerikës, Donald Trump, ka kryer mashtrim, ka konstatuar një gjykatës në New York.

Vendimi i gjyqtarit Arthur Engoron erdhi disa ditë përpara se çështja civile që përfshin zyrën e Prokurorit të Përgjithshëm të Nju Jorkut dhe ish-presidentin të shkonte në gjyq.

Vendimi zgjidh pretendimin kyç të bërë nga prokurorja e përgjithshme e Nju Jorkut në padinë e saj civile kundër ish-presidentit.

“Dokumentet këtu përmbajnë qartë vlerësime mashtruese që të pandehurit i përdornin në biznes”, shkroi gjyqtari.

Është një goditje e madhe për zotin Trump përpara se çështja të shkojë në gjyq të hënën e ardhshme.

Një avokat i zotit Trump e quajti vendimin e gjyqtarit "një gabim drejtësie" në një deklaratë të martën në mbrëmje.

Prokurorja e Përgjithshme Letitia James paditi zotin Trump shtatorin e kaluar, duke e akuzuar atë, dy djemtë e tij të rritur dhe Organizatën Trump se gënjejnë për vlerën e tij neto dhe vlerat e aseteve midis 2011 dhe 2021.

Zonja James pretendoi se të pandehurit lëshuan të dhëna të rreme biznesi dhe pasqyra financiare në mënyrë që të merrnin kushte më të mira për kreditë bankare dhe marrëveshjet e sigurimit dhe të paguanin më pak taksa.

Në një gjyq që tani do të zgjidhë gjashtë pretendimet e mbetura në padinë e saj, ajo do të kërkojë 250 milionë dollarë dënime dhe një ndalim për zotin Trump të bëjë biznes në shtetin e tij të origjinës.

Gjyqi pa juri është planifikuar të fillojë më 2 tetor dhe të zgjasë të paktën deri në dhjetor.