Izraeli sulmon Gazën dhe urdhëron evakuim të ri, shkon në 50 mijë numri i të vdekurve palestinezë

Sulmet izraelite në të gjithë Rripin jugor të Gazës vranë të paktën 26 palestinezë gjatë natës të së dielës, duke përfshirë një udhëheqës politik të Hamasit dhe disa gra e fëmijë.

Ushtria dërgoi trupa tokësore në një pjesë të qytetit jugor të Rafah, ndërsa mijëra palestinezë iu bindën urdhrave të reja të evakuimit.

Ministria e Shëndetësisë e Gazës tha se numri i përgjithshëm i palestinezëve të vrarë në Gaza që nga fillimi i luftës Izrael-Hamas ka kaluar tashmë 50,000 pasi Izraeli i dha fund armëpushimit javën e kaluar me një valë sulmesh që vranë qindra persona.

Izraeli ka vazhduar të godasë, siç thotë, objektivat e militantëve dhe ka nisur inkursione tokësore në veri të Gazës.

Të shtunën vonë, kabineti i Izraelit miratoi një propozim për krijimin e një drejtorie të re me detyrë për të avancuar "largimin vullnetar" të palestinezëve në përputhje me propozimin e Presidentit të SHBA Donald Trump për të shpopulluar Gazën dhe për ta rindërtuar atë për të tjerët.

Palestinezët thonë se nuk duan të largohen nga atdheu i tyre dhe grupet e të drejtave të njeriut kanë thënë se plani mund të çojë në dëbim në kundërshtim me ligjin ndërkombëtar.

Ministri izraelit i Mbrojtjes, Israel Katz tha se trupi i ri do t'i nënshtrohet ligjit izraelit dhe ndërkombëtar dhe do të koordinojë "kalimin nga toka, deti dhe ajri për në vendet e destinacionit".

Ushtria urdhëroi njerëzit të largoheshin nga lagjja tashmë e shkatërruar rëndë e Rafahut Tel al-Sultan në këmbë përgjatë një rruge të vetme për në Muwasi, një zonë e madhe me kampe çadrash të mjera.

Më vonë njoftoi se trupat kishin rrethuar Tel al-Sultanin për të eliminuar luftëtarët e Hamasit dhe infrastrukturën militante.

Ministria e Shëndetësisë e Gazës tha se gjithsej 50,021 palestinezë janë vrarë në luftë dhe më shumë se 113,000 janë plagosur.

Numri i fundit i shpallur të dielën përfshin 673 njerëz të vrarë që nga bombardimi i papritur i Izraelit të martën, si dhe 233 trupa që u identifikuan së fundmi, tha ministria.

Ministria nuk bën dallim mes civilëve dhe luftëtarëve në të dhënat e saj, por ka thënë se gratë dhe fëmijët përbëjnë më shumë se gjysmën e të vdekurve. Izraeli thotë se ka vrarë rreth 20,000 luftëtarë, pa dhënë prova.