MIE reagon pas protestës së naftëtarëve: Reduktimi i pagave vetëm për administratën e Albpetrolit

Ministria e Infrastrukturës dhe Energjisë ka reaguar pas ditës së dytë të protestës së naftëtarëve të Fierit dhe Kuçovës, të cilët kundërshtojnë shkurtimin e pagave të tyre nga ana e Albpetrolit.

Në një njoftim të shpërndarë për mediat, MIE sqaron se në dialog edhe me përfaqësuesit e Sindikatës së punonjësve ka pezulluar procesin e ristrukturimit si dhe i ka rekomanduar shoqërisë një rregullim të brendshëm të nivelit të pagave.

Si rezultat i kësaj ndërhyrjeje është bërë e mundur që:

• Punonjësit e terrenit, të cilët kontribuojnë për prodhimin, pra naftëtarët dhe specialistët e tjerë, do të vazhdojnë të përfitojnë të njëjtat të drejta në pagë.
• Asnjë punonjës i Albpetrol të mos humbasë vendin e punës deri në përfundim të situatës së pandemisë së COVID-19.
• Pezullohet procesi i ristrukturimit dhe të gjithë punonjësit e njoftuar më parë për ndërprerje të marrëdhënieve të punës do të paguhen me pagën e luftës deri në përfundim të periudhës së pandemisë së COVID-19.
• Reduktimi i pagës deri në 60% është bërë vetëm për administratën e shoqërisë, e cila ka pasur një nivel të lartë page.

MIE thekson se do të mbajë në vëmendje procesin e ristrukturimit dhe forcimit të shoqërisë Albpetrol si dhe kujdesin social për punonjësit e saj.

Naftëtarët e Fierit dhe Kuçovës kanë protestuar dje dhe sot, duke kërkuar sqarime për ndryshimet në paga.