Presidenti amerikan Donald Trump nënshkroi të enjten një urdhër ekzekutiv duke u bërë thirrje qyteteve dhe shteteve që të çmontojnë të gjitha kampet e të pastrehëve dhe t’i zhvendosin njerëzit që jetojnë atje në qendra trajtimi.
Avokatët e personave që jetojnë në kampe të tilla paralajmëruan se ky veprim vetëm sa do ta përkeqësonte problemin.
Urdhri i udhëzon Prokurores së Përgjithshme Pam Bondi të përmbysë precedentët ligjorë në nivel shtetëror dhe federal dhe të japë pëlqimin për iniciativat lokale për çmontimin e kampeve të pastrehë.
Megjithatë, është e paqartë se si Bodhi mundi t’i përmbysë vendime të tilla.
Urdhri vjen pas një vendimi të Gjykatës Supreme federale të vitit 2024 që u lejoi komunave të ndalonin kampet e të pastrehëve.
Koalicioni Kombëtar për të Pastrehët e denoncoi urdhrin, duke thënë se dëmton mjetet ligjore për të mbrojtur të pastrehët dhe të sëmurët mendorë.
Sipas organizatës, administrata Trump ka një “rekord shqetësues” të “shpërfilljes së të drejtave civile dhe procesit të rregullt ligjor”.
Koalicioni paralajmëroi se kriza e të pastrehëve ka të ngjarë të përkeqësohet me këtë urdhër ekzekutiv.
Presidenti Trump tha në urdhër se ata që jetojnë në kampe duhet të transferohen në qendra trajtimi për shëndetin mendor ose në qendra rehabilitimi nga droga. Ai nuk përmendi planet për zgjerimin e këtyre qendrave ose për të ofruar strehim të përballueshëm në planin afatgjatë.
Në vitin 2024, u vlerësua se numri i personave të pastrehë në Shtetet e Bashkuara tejkaloi 770.000. Ky është një numër që është rritur me 18%, sipas Këshillit Ndëragjencor për Pastrehësinë, një agjenci qeveritare.
Nga këta njerëz, 36% jetonin në rrugë, në automjete ose në kampe, sipas shifrave zyrtare.
Sipas Qendrës Kombëtare Ligjore për të Pastrehët, urdhri, i kombinuar me shkurtimet buxhetore për strehimin dhe kujdesin shëndetësor, do të rrisë më tej numrin e personave të pastrehë.
Ai theksoi gjithashtu se transferimi i detyruar i të pastrehëve në qendrat e trajtimit është “joetik, joefektiv dhe i paligjshëm” dhe se plani i Shtëpisë së Bardhë do të shndërrojë edhe më shumë njerëz në të pastrehë, ndërsa në të njëjtën kohë do t'u privojë burimet njerëzve që kanë nevojë për to.
Organizata të tjera besojnë se dekreti kërcënon të kriminalizojë jetën e të pastrehëve, pasi do t'i detyrojë njerëzit të largohen nga rrugët pa garantuar në asnjë mënyrë se do të gjendet strehim për ta.
Studiuesit e fenomenit besojnë se kriza e të pastrehëve filloi kur spitalet psikiatrike u mbyllën në vitet 1960 dhe 1970 dhe kujdesi për të pastrehët u promovua në nivel komuniteti.
Ata shpjegojnë se ky tranzicion u bë pa fonde të mjaftueshme dhe në mënyrë joefikase, duke i lënë njerëzit me probleme serioze të shëndetit mendor pa trajtim dhe strehim.
Sipas këtyre ekspertëve, shkaqe të tjera mendohet të jenë një mungesë akute e strehimit të përballueshëm, një rritje në përqindjen e qytetarëve të prekur nga varfëria dhe shkurtime në programet e ndihmës që ofronin akses në strehim për punëtorët dhe programe strehimi të subvencionuara publikisht.
Urdhri ekzekutiv i jep përparësi donacioneve dhe financimit për qytetet që kanë vendosur dhe po zbatojnë ndalime për kamping në hapësira publike, përdorimin e substancave dhe pushtimin e ndërtesave.
Gjithashtu parandalon financimin për krijimin e objekteve të kontrollit të përdorimit të drogës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
