Pas ngjarjes së rëndë të ndodhur dje, ku 3 persona mbetën të vrarë dhe një tjetër i plagosur, në lokalin ku ndodhi atentati zjarrfikësit kanë pastruar mëngjesin e sotëm gjakun që ka ngel pas.
Shënjestër e atentatit ka qenë Shyqyri Kalemi, babai i Andrea Kalemit, i cili nuk i mbijetoi dot plumbave.
Ndërsa MCN TV ka siguruar edhe disa prononcime nga banorët e zonës së Memaliajit, të cilët shprehen se ishin traumatizuar kur dëgjuan për ngjarjen e rëndë.
Sa i përket të shtënave, askush prej tyre duket se nuk ka dëgjuar gjë teksa ndihen të tronditur për ngjarjen dhe të frikësuar.
Ata thonë se e njihnin Shyqyri Kalemin si një njeri të respektuar të zonës, por nuk kanë dijeni për konfliktet.
"Nuk na erdhi mirë kur e dëgjuam. Dolëm, por nuk shkuam më tutje, nuk dinim gjë. Zhurmë nuk dëgjova. Shyqon (Shyqyri Kalemin), e njihja në lokal, në punë, hallexhi. Hallexhi si gjithë të tjerët. Jemi të tronditur”, u shpreh një banor i zonës.
Nga atentati kanë mbetur të vrarë shtetasit Shyqyri Kalemi, Marsel Cela si edhe Gledian Muka. Plagë nga plumbat ka marrë edhe Artur Kalemi, i cili është dërguar me urgjencë në spital.
Objektiv i atentatit dyshohet të këtë qenë Shyqyri Kalemi, babai i Zamir dhe Andrea Kalemit, të dy me precedentë penalë dhe që i kanë shpëtuar disa atentateve, brenda e jashtë vendit. Në qytezën e Memaliajt sot ka pllakosur heshtja totale.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
