Kreu i Komisionit të Ligjeve, deputeti socialist Ulsi Manja, ka komentuar deklaratën e djeshme të presidentit të Republikës, Ilir Meta. I pyetur lidhur me paralajmërimin e Metës se nuk do t’i dekretojë ndryshimet në ligjin për Gjykatën Kushtetuese, Manja tha se nëse Presidenti e bën një gjë të tillë, Kuvendi do ta rrëzojë dekretin e tij, duke i kujtuar atij se Shqipëria është republikë parlamentare.
“Për presidentin e kam të qartë përgjigjen, kjo mazhorancë do të zbatojë kushtetutën, ligjet e vendit dhe rregulloren e Kuvendit. Nëse presidenti në vazhdën e shumë ligjeve që nuk i dekreton dhe ia kthen përsëri Kuvendit, Kuvendi do të rrëzojë dekretin e presidentit. Presidenti mund të këtë parasysh shumë gjëra por duhet t’i referohet nenit 1 të Kushtetutës së Shqipërisë. Shqipëria është Republike Parlamentare. Presidenti është një institucion kushtetues që buron nga Kuvendi i Shqipërisë dhe është i detyruar si çdo institucion tjetër t’i bindet kushtetutës dhe ligjeve të vendit”, tha ai.
Ndërsa lidhur me mundësinë e shpërndarjes së Parlamentit nga presidenti, Manja tha se është absurde dhe ta mendosh dhe se do ishte një shkelje e rëndë. Manja i kujtoi Metës se ai është në procedurë shkarkimi.
“Presidenti është në një procedurë shkarkimi në Kuvendin e Shqipërisë, është brenda afateve që ka përcaktuar Kuvendi. Lidhur me shpërndarjen e Parlamentit nga ana e presidentit, edhe në këtë rast Kushtetuta e ka bërë të qartë se në cilat raste shpërndahet Parlamenti, është diçka absurde ta mendosh. Besoj do të ishte shkelja më e rëndë, atentati më i rëndë që mund t’i bëhet Kushtetutës së vendit”, tha ai.
Deklaratës së deputetit socialist, Presidenca iu përgjigj brenda pak minutash nëpërmjet zëdhënësit Tedi Blushi.
“Parlamentin do e shpërndajë populli. Presidenti vetëm do zbatojë vullnetin e tij. Dhe dekretin për kthimin e ligjit për grushtin e shtetit do e vendosë populli. Presidenti vetëm do e firmosë në emër të tij. DO KETË DISA DEKRETE PËR SHPARTALLIMIN E GRUSHTIT TË SHTETIT.
BËNI DURIM! DEKRETET DO T’I ZBATOJË POPULLI SHQIPTAR”, shkroi ai në rrjetet sociale.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
