Aktori rus Vladimir Mashkov i cili është në qendër të një hetimi penal, i është ndaluar hyrja në Ukrainë. Kjo u raportua nga SBU, Shërbimi Informativ i Kievit dhe Prokuroria e Ukrainës.
Drejtori artistik i Shkollës së Teatrit të Moskës “Oleg Tabakov”, Mashkov me një sërë arritjesh në vendin e tij, në vitin 2011 ishte pjesë e kastit “Mission: Impossible - Ghost Protocol”, bashkë me aktorin Tom Cruise.
Gjatë zgjedhjeve presidenciale 2018 në Rusi, ai ishte një nga të besuarit e Presidentit rus Vladimir Putin gjatë fushatës së tij zgjedhore.
Sipas hetimit ukrainas, gjatë vitit 2022 Mashkov ndoqi sistematikisht koncerte dhe ngjarje të tjera publike në mbështetje të Rusisë në territoret e pushtuara nga Rusia të rajonit të Luhanskut dhe rajonit të Donetskut. Përveç kësaj, aktori ka udhëtuar vazhdimisht në Krimenë e pushtuar për të mbështetur shpirtin luftarak të pushtuesve.
Në Instagram dhe Telegram, aktori bëri thirrje për aneksimin e paligjshëm të rajoneve Luhansk, Donetsk, Kherson dhe Zaporizhzhia në Federatën Ruse, çka sipas mediave në Kiev, do të thotë se ai kërkoi një ndryshim në kufijtë e territorit të Ukrainës.
Mashkov justifikoi dhe njohu agresionin e armatosur të Rusisë kundër Ukrainës si të ligjshëm.
Tekstet e publikuara prej tij konsiderohen nga drejtësia ukrainase si një mënyrë efektive me natyrë propagandistike dhe justifikojnë pushtimin rus.
Vajza e Mashkovit, Masha Mashkova, e cila është aktore në SHBA, është shprehur kundër qëndrimeve të babait të saj dhe është distancuar.
“Ajo që po ndodh tani është thjesht e paimagjinueshme dhe fakti që kaq shumë rusë, përfshirë babain tim, besojnë se kjo dhunë është disi e justifikuar, më thyen zemrën,” tha Mashkova për CNN.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
