Tre punonjës të Doganës së Kapshticës janë proceduar penalisht pasi dyshohet se kanë abuzuar me detyrën e tyre. Sipas Policisë së Korçës, më 15 prill 2025, ata kanë lejuar kalimin e një kamioni me mallra ushqimore pa kryer kontrollin dhe procedurat e nevojshme doganore.
Dokumentet që shoqëronin këtë ngarkesë dyshohet se ishin të falsifikuara. Në vend që të njoftonin autoritetet përkatëse për këtë rast, punonjësit kanë vepruar në mënyrë të parregullt, duke e regjistruar ngarkesën me dokumente të dyshimta.
Bëhet me dije se ka nisur procedimin penal në gjendje të lirë për veprën penale “Shpërdorimi i detyrës” ndaj shtetasve: Vasfi Toska 49 vjeç, banues në Korçë; Erjon Gozhdari 45 vjeç, banues në Tiranë; Anxhela Elezi 39 vjeçe, banuese në Korçë.
Në hetim janë përfshirë edhe zyrtarë të nivelit më të lartë, Drejtori i Hetimit Doganor në Drejtorinë e Përgjithshme të Doganave, Dritan Çekani si dhe dy specialistë për Hetimin Doganor pasi dyshohet se edhe ata kanë shmangur përgjegjësinë për njoftimin e organeve ligjzbatuese.
Hetimet janë në vijim për të zbuluar të tjerë të përfshirë dhe për të sqaruar më tej çështjen e ngarkesës dhe përmbajtjen e saj.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
