Pas përfundimit të zgjedhjeve në Maqedoni lideri i LSDM-s Zoran Zaev, ka bërë thirrje që të gjitha partitë politike shqiptare, që fituan mandate në zgjedhjet e së dielës, t’i bashkohen partisë së tij për formimin e qeverisë së re dhe ta refuzojnë Nikolla Gruevskin.
“Të gjitha partitë, përveç VMRO DPMNE-në nuk duhet të mendojnë për të shkelur vullnetin e shprehur në zgjedhje për formimin e qeverisë në koalicion me Nikolla Gruevskin. Rezultatet e para kanë hutuar qytetarët”, deklaroi Zaev.
Në një dalje për mediat Zaev deklaroi se ka pasur gabime në disa qendra dhe nëse korrigjohen një pjesë e numrave, LSDM do të ketë më shumë mandate në njësinë e gjashtë zgjedhore dhe me këtë rezultati do të jetë 50 me 50 në deputetë.
Ai tha se në zgjedhjet e së dielës kishte një fitore historike nga ana e qytetarëve të Maqedonisë, që nuk guxon sipas tij, në asnjë mënyrë të shuhet.
Formimi i qeverisë së re është në duart e partive shqiptare pasi as VMRO-ja e as LSDM-ja nuk do të jenë në gjendje të formojnë qeverinë e re.
Partitë shqiptare kanë fituar 20 mandate, BDI 10, Lëvizja BESA 5 Aleanca për Shqiptarët 3 dhe PDSH 2.
Por nuk është e vetme LSDM-ja e cila ka kontestuar disa zona, pasi edhe Lëvizja BESA ka paraqitur ankesë në Komisionin Shtetëror Zgjedhor, në lidhje me, mospërputhjen e rezultateve reale nga terreni me të dhënat elektronike të KSHZ-së mbi numërimin e votave të zgjedhjeve të parakohshme parlamentare të 11 dhjetorit.
Ky subjekt politik konsideron se kontestues janë dy mandate nga Njësia e dytë dhe Njësia e gjashtë zgjedhore. Përfaqësuesi i Lëvizjes BESA, Blerim Sejdiu, përmendi disa raste të parregullsive, të tilla si votim familjar, prerje të fletëvotimeve në kundërshtim me ligjin duke u arsyetuar se nuk kanë gërshërë, si dhe mosvulosje të fletëvotimeve me qëllim që më vonë të shpallen të pavlefshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
