Hetime për vdekjen e tifozit të AEK-ut në Greqi, si nisi përleshja dhe dyshimet për rolin e policisë

Në Greqi kanë nisur hetimet për të përcaktuar se si rreth 100-120 huliganë kroatë që udhëtonin me autobusë dhe makina morën rrugën për në Athinë nga Zagrebi të hënën dhe u përfshinë në përleshje vdekjeprurëse me tifozët vendas të futbollit, pavarësisht ndalimit të tifozëve që udhëtonin në Greqi.

Kathimerini duke cituar burime tha se Departamenti i Policisë Helenike (ELAS) për krimet sportive ishte vënë në dijeni për mbërritjen e tifozëve kroatë në pikën e Kakavisë në kufirin e Greqisë me Shqipërinë që në orët e para të pasdites së së hënës.
Njoftime u dërguan nga selia e policisë në Athinë në të gjitha departamentet e policisë së qarkut ku autokolona e tifozëve kroatë do të kalonte për të mbërritur në kryeqytet, me urdhër për t'i mbajtur ata nën vëzhgim.

Autokolona, me sa duket, u ndoq vetëm për pak kohë në Rio në Greqinë perëndimore. Pikërisht këtu po fokusohen hetimet, te mungesa e survejimit të duhur. 
Tifozët kroatë, që besohet se i përkasin një grupi të organizuar huliganësh, thuhet se u takuan me anëtarët e një klubi të lidhur nga Athina në një vend të paracaktuar dhe së bashku u nisën me makinë dhe tren për në stadiumin e AEK-ut në Nea Filadelfia.

Dinamo Zagreb sapo kishte përfunduar stërvitjen, në kuadër të ndeshjes së anuluar, që planifikohej të luhej sot, për raundin e tretë kualifikues të UEFA Champions League.
Përplasja ka ndodhur me dhjetëra tifozë të AEK-ut jashtë stadiumit. Raportohet se mbështetësit e AEK-ut po rrinin në bare dhe kafene në afërsi.

Përleshja mes dy grupeve ishte e dhunshme dhe përfshinte kokteje molotovi, shkopinj dhe thika. 

Një mbështetës i ri i AEK-ut u godit disa herë me thikë dhe vdiq menjëherë në spital. Mosha e tij fillimisht ishte 22, megjithëse më vonë u raportua se ai ishte 29 vjeç. Policia ka arrestuar dhjetëra grekë dhe kroatë, megjithëse nuk është e qartë nëse personi që mund të ketë kryer goditjen me thikë është mes tyre. Incidenti vjen në një kohë kur Greqia do të presë më 16 gusht finalen e Superkupës së UEFA-s në stadiumin Georgios Karaiskakis.