Struktura e Posaçme kundër Korrupsionit dhe Krimit të Organizuar, SPAK, publikoi ditën e sotme raportin vjetor për vitin 2025, ku paraqiten rezultatet, sfidat dhe zhvillimet kryesore në luftën kundër korrupsionit dhe krimit të organizuar në Shqipëri.
Raporti evidenton rritje të hetimeve, forcim të bashkëpunimit ndërkombëtar dhe përmirësim të kapaciteteve institucionale.
Gjatë vitit 2025 janë hetuar gjithsej 871 procedime penale, nga të cilat 294 procedime të reja, ndërsa pjesa tjetër janë çështje të mbartura nga viti i kaluar. Krahasuar me vitin 2024, volumi i hetimeve ka shënuar një rritje prej rreth 4.9%, duke reflektuar zgjerimin e aktivitetit të institucionit në ndjekjen e veprave penale.
Në luftën kundër krimit të organizuar dhe korrupsionit, SPAK ka intensifikuar edhe hetimet financiare dhe pasurore. Gjatë vitit 2025 janë sekuestruar dhe konfiskuar pasuri me vlerë rreth 45.4 milionë euro, ku pjesa më e madhe janë pasuri të sekuestruara nga aktivitet kriminal.
Në këtë shumë përfshihet edhe sekuestrimi i kriptovalutave me vlerë rreth 12.4 milionë euro.
Raporti tregon gjithashtu një fokus më të madh në çështje komplekse. Edhe pse numri i procedimeve të dërguara në gjykatë ka rënë, numri i personave të përfshirë në këto çështje është rritur, duke treguar se hetimet janë përqendruar në struktura më të mëdha kriminale.
Sa i përket korrupsionit, gjatë vitit 2025 janë dërguar në gjykatë 24 procedime për korrupsion jo të nivelit të lartë me 147 të pandehur, si dhe 10 procedime për korrupsion të nivelit të lartë me 13 të pandehur.
Nga 30 zyrtarë dhe ish-zyrtarë të lartë nën hetim, më shumë se gjysma janë dërguar për gjykim dhe disa prej tyre janë dënuar me vendime të formës së prerë.
Një tregues tjetër i rëndësishëm është edhe besimi i publikut, pasi rreth një e treta e hetimeve të reja janë nisur nga kallëzime të qytetarëve. Gjithashtu është rritur bashkëpunimi me Policinë e Shtetit dhe institucionet e tjera, duke shtuar referimet për hetime.
Megjithatë, raporti evidenton edhe disa sfida, si hetimi i krimit të organizuar në nivele të larta, nevoja për më shumë kapacitete njerëzore dhe përmirësimi i bashkëpunimit institucional. SPAK thekson gjithashtu rëndësinë e ruajtjes së pavarësisë së institucionit për të garantuar funksionimin e shtetit të së drejtës.
Raporti vjetor vlerëson se gjatë vitit 2025 është bërë progres i dukshëm në forcimin e luftës kundër korrupsionit dhe krimit të organizuar, duke u vlerësuar pozitivisht edhe nga institucionet ndërkombëtare dhe Bashkimi Europian.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
