Rusia sulm me dron në të gjithë Ukrainën, Zelensky: Lufta vazhdon, duhet unitet për paqen

Rusia ka nisur një sulm në shkallë të gjerë me dron kundër Ukrainës në prag të përvjetorit të tretë të luftës.

Yuriy Ignat, zëdhënës i Komandës së Forcave Ajrore të Ukrainës, tha se një "rekord" 267 dronë rusë u lëshuan në një sulm të vetëm, të koordinuar.

Ndër to, 138 u kapën nga mbrojtja ajrore ndërsa 119 u zhdukën nga radarët pasi u bllokuan dhe nuk shkaktuan asnjë dëm.

Dronët u kapën në të paktën 13 rajone duke përfshirë Kharkiv, Poltava, Sumy, Kyiv, Chernihiv, Mykolaiv dhe Odesa, sipas autoriteteve ukrainase.

Shërbimet e urgjencës thonë se sulmet shkaktuan shkatërrime dhe u vunë flakën ndërtesave në një numër rajonesh gjatë natës.

Nuk është e qartë se sa njerëz kanë vdekur, por shifrat fillestare nga shërbimet e urgjencës sugjerojnë se ka pasur të paktën tre viktima.

Ndërkohë, ministria ruse e mbrojtjes tha të dielën se 20 dronë ukrainas të nisur në Rusi u "shkatërruan" gjatë natës.

“Lufta vazhdon”, shkruan Zelensky në një deklaratë pas sulmit, duke kërkuar ndihmë për të sjellë paqen në rajon.

Të gjithë ata që janë në gjendje të ndihmojnë me mbrojtjen ajrore duhet ta bëjnë këtë për të mbrojtur jetët njerëzore. Ne duhet të bëjmë gjithçka që është e mundur për të sjellë një paqe të qëndrueshme dhe të drejtë në Ukrainë. Kjo është e arritshme nëpërmjet unitetit të të gjithë partnerëve.

Ai bën thirrje për "forcën e të gjithë Evropës, forcën e Amerikës, forcën e kujtdo që kërkon paqe të qëndrueshme".