Pak e dinë që forma e kokës së një të porsalinduri ka rëndësi të madhe për zhvillimin e mëtejshëm.
Në disa raste, koka mund të marrë një formë të pazakontë të sheshtë, e njohur në mjekësi si plagiocefali.
Për këtë problem, mjekësia rekomandon përdorimin e helmetave korrigjuese, pajisje që vendosen në kokën e butë të foshnjës për disa orë në ditë, me qëllim që të ndihmojnë në formimin e një forme më të rrumbullakët të kafkës.
Me këtë përvojë është përballur edhe Pranvera Pere, një nënë shqiptare që jeton në Gjermani, e cila për shikuesit e programit të mëngjesit “Zgjohu me MCN”, ndau historinë e saj me djalin 11-muajsh.
E vumë re që djali nuk kthehej në anën e majtë që në moshën 2 muaj e gjysmë.
Pas konsultës me pediatren, rezultoi se kishte një ngërç që e pengonte të lëvizte qafën në njërën anë, çka e çoi në sheshtim të pjesës së pasme të kokës.
Fillimisht, familja ndoqi terapi osteopatike për disa muaj, por rezultati nuk ishte i mjaftueshëm.
Në këtë pikë, mjekët sugjeruan vendosjen e helmetës korrigjuese që si ide fillimisht i trembi.
Pas 6 muajsh edhe pas terapisë osteopatike, forma e kokës ende nuk ishte rregulluar. Na u tha se sa më herët të ndërhyje, aq më mirë, sepse më vonë do të ishte shumë e vështirë për t’u korrigjuar.
Na dukej e çuditshme, madje shqetësoheshim për ndikimin që mund të kishte tek djali. Por kur pamë që rritja po theksonte edhe më shumë asimetrinë e kokës, vendosëm që ishte koha për të vepruar.
Djali filloi të mbante helmetën në moshën 7 muajshe. Sot, ai e mban për 23 orë e gjysmë në ditë, dhe hiqet vetëm për dushin ditor.
Duhet mbajtur rreth 9 muaj, deri kur fëmija i afrohet moshës 2 vjeç. Pas kësaj moshe, ndërhyrja nuk është më efektive, kështu na kanë thënë mjekët.
Pranvera nënvizon rëndësinë e informimit dhe ndërhyrjes së hershme.
Për prindërit që përballen me të njëjtin problem, mos kini frikë. Helmetat janë zgjidhje funksionale dhe ndihmojnë vërtet në korrigjimin e formës së kokës. Është më mirë të veproni herët, sesa të pendoheni më vonë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
