Emisioni "Xhadat" denoncoi shkeljen e kushteve të transportit të mishit në Tiranë ku nga zona e njohur si “Frigoriferi” ose ish-gazhina e mishit, produktet e mishit që blihen me shumicë transportohen me mjete të zakonshme, jofrigoriferike. Në pamjet e transmetuara nga "Xhadat" mishi ngarkohet në vetura dhe furgona jofrigoriferikë.
Për të denoncuar këtë paligjshmëri gazetari Andi Llabuti, duke u prezantuar si qytetar telefonoi në numrin e gjelbër të Autoritetit Kombëtar të Ushqimit. Vajza e cila u përgjigj në këtë numër kërkoi nga "qytetari" edhe disa foto nga rasti, të cilat gazetari ja dërgoi në e-mail. Sipas punonjëses së AKU-së procedura që ndiqej pas denoncimit ishte përcjellja e informacionit pranë Drejtorisë së AKU Tiranë, e cila më pas do të inspektonte duke marrë dhe masa.
Denoncimi tek Autoriteti Kombëtar i Ushqimit u bë më datë 17 nëntor. Pesë ditë pas denoncimit tek ish-gazhina e mishit asgjë nuk kishte ndryshuar. Mishi vazhdonte të transportohej pa mjete frigoriferike. 10 ditë pas denoncimit tek AKU-ja, as "qytetarit" gazetar nuk i ka mbërritur asnjë përgjigje. Kjo tregon se institucioni më i lartë i garantimit të sigurisë ushqimore në vend, edhe kur merr denoncime, nuk vepron.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
