Kreu i PD-së Lulzim Basha akuzoi kryeministrin Edi Rama se tentoi t’i mbyllte gojën opozitës përmes Gramoz Ruçit që sipas tij dhunoi rregulloren e Kuvendit. Në një deklaratë për mediat pas mbledhjes së grupit parlamentar, Basha tha se opozita do të intensifikojë aktivitetin parlamentar.
“Jam këtu për sa i përket qëndrimit të PD-së në seancë plenare dhe aktivitet parlamentar. Kjo në vijim të ngjarjes së shëmtuar të javës së kaluar dhe dy javëve të kaluar ku Edi Rama përmes Gramoz Ruçit u mundua të dhunojë rregulloren duke i mbyllur gojën opozitës. Kjo nuk ka për t’u pranuar kurrë dhe nuk do të ndodhë, e kundërta do të ndodhë. Ne do të intensifikojmë aktivitetin tonë parlamentar duke rikthyer një praktikë konform rregullores që është praktika e seancës së pyetjeve”, deklaroi kreu i PD-së.
Por nuk ka munguar ironia për vendimin e fundit të kryeministrit Edi Rama për hapjen e Pallatit të Brigadave në fundjavë për publikun.
“Do kërkojmë seancë pyetjes për të vendosur Ramën dhe ministrat e tij para përgjegjësisë, i cili po mundohet të largohet çdo ditë duke dalë një ditë si bahçevan e një ditë si kopshtar. Paska hapur dhe Pallatin Mbretëror për qytetarët. Këtej rrit taksat, këtej më shumë bar për qytetarët. Sigurisht që nuk është as bahçevan e as kopshtar është përgjegjësi për një Shqipëri të fundosur nga krimi, të vetmin vend që nuk i hapen negociatat”, tha Basha.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
