Qeveria dhe policia nuk kanë pasur vullnetin për të arrestuar Klement Balilit. Ambasadori amerikan, Donald Lu, thotë se mbetet ende për t’u bërë në luftën për arrestimin e “peshqve të mëdhenj”.
Gjatë një aktiviteti në Ministrinë e Brendshme, ku ishte i pranishëm edhe kryeministri Rama, Lu e quajti dështim të qeverisë dhe policisë mosarrestimin e Klement Balilit.
"Dy vjet më parë, DEA bashkëpunoi me policinë greke për arrestimin e disa anëtarëve të bandës së Balilit në Greqi. Më pas, gjykatat greke e dënuan Balilin. Ai është një bos i fuqishëm i krimit të organizuar me lidhje politike. Për 2 vjet, qeveria, policia dhe prokurorët nuk kanë pasur aftësinë ose vullnetin që ta arrestojnë. Askush nuk është mbi ligjin. U bëj thirrje kryeministrit Rama, ministrit Xhafa dhe prokurorisë të vazhdojnë pa mëshirë luftën kundër krimit të organizuar", tha ai.
Ambasadori amerikan vlerësoi megjithatë arrestimet e disa emrave të njohur në trafikun e drogës dhe hetimet e nisura ndaj ish-ministrit Tahiri dhe ish-kryeprokurorit Llalla.
“Shumë ka ndodhur në 8 muaj, e shumë ka mbetur për t’u bërë. Shqipëria mbështeti arrestimin e trafikantit të madh Met Kanani në Turqi, më pas banda e tij u arrestua në Shqipëri. Policia mbështeti sekuestrimin e 613 kg kokainë dhe arrestimin e Arbër Çekaj në Gjermani. Disa anëtarë të bandës së tij janë arrestuar dhe do arrestohen të tjerë. Hetimi penal kundër ish-ministrit të brendshëm Saimir Tahiri dhe ish-kryeprokurorit Adriatik Llalla vazhdon. Shumë aktivitet për një periudhë të shkurtër kohe por duam rezultate konkrete. Duam që peshqit e mëdhenj të ndiqen penalisht, të dënohen dhe futen në burg. Ky do ishte sukses”, deklaroi Lu.
Rama: Balili, i promovuar politikisht
Në fjalën e tij në të njëjtin aktivitet, kryeministri Rama tha se po punohet për kapjen e Balilit, ndërsa shtoi se lidhjet politike të Balilit e bënë të vështirë kapjen e tij.
“Ambasadori Lu foli për çështjen e Klement Balilit. Arritja në kapjen e këtij personazhi të botës së krimit është një domosdoshmëri, dhe do të jetë një sukses i madh. Por mos harrojmë se vetëm pak vite më parë ky person ishte drejtor. I lidhur politikisht dhe politikisht i promovuar, jo drejtor peshkimi, por drejtor transporti. Dhe sot është në kërkim. Në bashkëpunim me partnerët, ai do të kapet”, tha kryeministri Rama.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
