Në Gjykatën e Posaçme të Apelit Kundër Korrupsionit dhe Krimit të Organizuar u mbajt ditën e sotme seanca ndaj ish-Kryeministrit Sali Berisha, ku ai nuk ishte i pranishëm.
Gjatë seancës e cila zgjati afro tre orë u shqyrtua masa e sigurisë “arrest shtëpie”, me anë të së cilës nëpërmjet avokatëve të tij Genc Gjokutaj dhe Sokol Mëngjesi, ish-kreu i qeverisë kërkon që t’i rikthehet liria.
Por vendimi për kërkesën e tij u shty për ditën e nesërme në orën 09.00, të enjten e 25 janarit.
Po ashtu siç raporton për MCN Live, gazetari Arsen Rusta, Berisha i cili po hetohet për shpërdorim detyre lidhur me privatizimin e kompleksit sportiv “Partizani”, kërkon edhe përjashtimin e gjyqtares Irena Gjoka, e cila ka caktuar edhe masën e sigurimit ndaj tij, por edhe prej faktit se kur ka qenë President e ka shkarkuar nga detyra.
Seanca e sotme nisi rreth orës 09:00 dhe kërkesa e ish-Kryeministrit u shqyrtua nga gjyqtarja e Apelit të Posaçëm, Ilirjana Olldashi e cila u zgjodh nëpërmjet shortit.
Kujtojmë që masa e arrestit ndaj Berishës u caktua më 30 dhjetor dhe që nga ajo ditë, ish-Kryeministri ndodhet në “arrest shtëpie”, ku në banesën e tij ka edhe një patrullë policie.
Ndërkohë që një ditë më parë Berisha u paraqit në SPAK, ai u mor në pyetje lidhur me çështjen “Partizani” për rreth dy orë.
Ditën e nesërme pritet të merret në pyetje Jamarbër Malltezi dhe biznesmeni Fatmir Bektashi.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
