Ministrja e Shëndetësisë, Ogerta Manastirliu, ka publikuar në rrjetin social “Facebook” një videomesazh nga rektori i Universitetit të Mjekësisë, prof. Arben Gjata, i cili u drejtohet qytetarëve lidhur me situatën e koronavirusit.
Ai u bën thirrje atyre që të vijojnë të zbatojnë masat e distancimit social dhe higjienës personale, edhe gjatë periudhës së hapjes.
Sipas tij, edhe pse është fundi i periudhës shumë të vështirë të pandemisë, këto dy masa duhen zbatuar edhe në vijim.
“Jemi në fundin e periudhës shumë të vështirë që kaluam të gjithë së bashku gjatë kësaj epidemie shumë të rëndësishme. Janë duke u marrë masa të hapjes së ekonomisë, jetës sociale, të mënyrës si punojmë, si jetojmë. Jemi drejt një finishi, ku të gjithë kemi dhënë kontribut. Falënderimi i parë është për mjekët në vijën e parë, por pa ju, pa bashkëpunimin dhe mirëkuptimin tuaj, do të ishte e pamundur t’ia dilnim kësaj situate.
Do të kërkoja nga ju që të vazhdojmë të jemi të ndërgjegjshëm, që janë vetëm masat e distancimit fizik, ruajtja e distancës, e higjienës personale, që janë të domosdoshme t’i vazhdojmë edhe në këtë periudhë hapjeje, në mënyrë që të mos kemi kthim pas.
Është mënyra e vetme dhe e domosdoshme, që ne të përshtatemi me realitetin e ri, me mënyrat e reja të jetesës, deri në fund të epidemisë, dhe kur të kemi masa të sigurta që të luftojmë siç duhet këtë virus. Ju bëj thirrje të gjithëve të na e lehtësoni punën në të ardhmen, siç keni bërë deri tani, duke respektuar rregullat e distancimit dhe higjienës”, shprehet Gjata.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
