Kanë nisur sërish tensionet në veri të Kosovës, mëngjesin e kësaj të hëne.
Pas një qetësia ditën e djeshme, sot pritet që qytetarët serbë të dalin sërish në protestë. Policia ushtarake e KFOR dhe policia e Kosovës kanë rrethuar ndërtesën e komunës.
KFOR qëndron në rreshtin e parë, ndërsa policia e Kosovës të ndërtesa e komunës dhe pika kontrolli përreth.
Raportohet se serbët lokalë kanë nisur protestën në Zveçan. Policia ka hedhur gaz lotsjellës për të neutralizuar situatën dhe për të shpërndarë turmën e protestuesve.
Policia e Kosovës, ka njoftuar se protestuesit në e Zveçan, kanë tentuar me dhunë të futen në objekt, duke përdorur gaz lotsjellës e duke u përplasur me policinë.
Sipas njoftimit, policia është detyruar të përdor sprej për t’i larguar ata dhe për ta vënë situatën nën kontroll.
Sakaq, në komunën e Zubin Potok, KFOR po patrullon para objektit. Grupe qytetarësh serbë u mblodhën edhe para ndërtesës së komunës në Leposaviç për të kundërshtuar marrjen e pushtetit lokal nga kryetari i ri shqiptar, Lulzim Hetemi. Ndërkohë, në Zubin Potok raportohet për forca të shtuara të KFOR-it para objektit komunal.
Ambasadori amerikan, Jeff Hovenier ka ftuar në takim kryetarët e rinj të katër komunave veriore, pas zhvillimeve të fundit dhe rindezjes së tensioneve. Lajmin e ka bërë të ditur, kryetari i Zveçanit, Ilir Peci i cili ka treguar se takimi do të mbahet në Prishtinë nga ora 09:00.
Në takim do të jenë edhe ambasadorët e vendeve të QUINT-it.
Ambasada e Francës, Gjermanisë, Italisë, Mbretërisë së Bashkuar dhe Shteteve të Bashkuara, së bashku me Zyrën e Bashkimit Evropian, kanë lëshuar një deklaratë të përbashkët duke shprehur shqetësimet e tyre dhe duke ripërsëritur deklaratën e para dy ditëve për të dënuar ashpër hyrjen me forcë në ndërtesat komunale në veri të Kosovës.
Po ashtu, në këtë deklaratë të përbashkët Qeveria e Kosovës paralajmërohet që të mos ndërmarrë asnjë masë të re për të detyruar hyrjen në ndërtesat komunale në Leposaviq, Zubin Potok dhe Zveçan.
Ngjashëm si vendet e QUINT-it, edhe Sekretari i Përgjithshëm i NATO-s, Jens Stoltenberg, i bëri thirrje Qeverisë së Kosovës që të de-pershkallëzojë situatën në veri të vendit dhe të mos ndërmarrë hapa të njëanshëm destabilizues, porse të angazhohet në procesin e dialogut për normalizimin e marrëdhënieve nën ndërmjetësimin e Bashkimit Evropian.
Kryeministri i Kosovës, Albin Kurti, mbrojti veprimet e policisë, duke thënë se çdo opsion tjetër do të ishte “mospërmbushje e obligimeve kushtetuese të Qeverisë ndaj kryetarëve të rinj”.
Ditën e premte situata doli jashtë kontrollit.
Protesta, hedhje gurësh, shok-bomba e gaz lotsjellës, e përfunduar ditën e djeshme të gjatë me 5 zyrtarë policorë të lënduar, e me dëmtime të veturave të policisë.
Gjithë kjo erdhi pas përplasjeve të serbëve lokalë me Policinë e Kosovës, të cilët hynë me forcë për të instaluar kryetarët e rinj shqiptarë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
