Analisti Andi Bushati tha në edicionin e lajmeve në MCN TV se është skeptik dhe pesimist për Task-Forcën e ngritur nga SPAK-u për krimin zgjedhor. Bushati tha se shkuara e SPAK-ut është e zezë, ku shpesh ka shërbyer si mbulesë e krimeve zgjedhore, apo si mashë e PS-së në rastin Beleri. Sipas analistit ka tri tabu të paprekshme nga SPAK-u, krimi zgjedhor, ekonomia kriminale dhe kryeministri Edi Rama.
“Jam skeptik apo pesimist. Pesimizmi s’vjen vetëm nga ai teksti që lexuam, por e shkuara e SPAK-ut është e zezë në raport me krimin zgjedhor. Nëse në këto 4 vite SPAK-u do na kishte zbardhur krimin zgjedhor të Elbasanit, që e fshehu në favor të PS, nëse do të na kishte zbardhur vjedhjen e të dhënave për 900 mijë shqiptarë nga PS, atëherë do kishim besim. Por SPAK-u deri tani ka qenë mbulesa e çdo krimi zgjedhor. Madje në rastin e Belerit ka shërbyer si mashë, që edhe atë që PS e humb me vota, SPAK t’ia kthejë me mjete juridike. Jam skeptik dhe mosbesues nisur nga e shkuara e SPAK-ut. Ka 3 tabu që SPAK-u s’i prek, mosprekja e krimit zgjedhor, mosprekja e ekonomisë kriminale, kullat e mëdha të ndërtuara, që institucionet ndërkombëtare thonë janë mjet i produktit kriminal, dhe tre Edi Rama. Këtu ka mungesë vullneti. E shkuara e SPAK-ut është e zezë. SPAK-u ka bërë operacione makiazhi për të ruajtur besimin te njerëzit që thonë SPAK-u është histori suksesi, por s’kemi deri tani ndëshkim real i krimit zgjedhor. SPAK-u është një levë për të forcuar regjimin autoritarist të Edi Ramës, dhe nuk prek shtyllat që mbajnë në këmbë regjimin”.
Duke folur mbi ndërprerjen e fondeve nga Uashingtoni, Bushati tha se sot është abuzim me të vërtetën të thuash që SHBA nuk e mbështet më SPAK-un.
Duke folur mbi protestat në Serbi, Bushati tha:
“I shoh shumë më tepër se sa një reagim ndaj një ngjarje të ndodhur dy muaj e gjysmë më parë, që vrau 15 viktima. Është një pakënaqësi me mungesën e demokracisë, dhe regjimin autoritarist të Vuçiçit. Dorëheqjet e fundit dhe arrestimi i personave përgjegjës për ngjarjen, sot praktikisht i kanë përmbushur kërkesat fillestare të studentëve, dhe protesta duhej të shfryhej. Por pakënaqësia është më tepër me mënyrën si po funksionon Serbia, dhe se si Serbia është bërë vend i një njeriu të vetëm, dhe besoj që protestat do vazhdojnë”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
