Çmimet e gazit janë rritur për shkak të shqetësimeve për furnizimin me energji pasi Rusia njoftoi se nuk do të rihapë tubacionin e saj kryesor të gazit në Europë.
Çmimi i gazit me shumicë për muajin e ardhshëm në Holandë, një pikë referimi për Europën, u rrit deri në 30% në fillimin e tregtimit të së hënës.
Gazsjellësi Nord Stream 1 ishte parashikuar se do të rihapej të shtunën pasi ishte mbyllur për tre ditë. Por firma shtetërore ruse e energjisë Gazprom deklaroi se kishte konstatuar një defekt dhe rrjedhje.
Europa ka akuzuar Rusinë për përdorimin e furnizimeve me gaz për të shantazhuar vendet europiane për shkak të konfliktit në Ukrainë, të cilin Moska e mohon.
Çmimet me shumicë kanë qenë shumë të paqëndrueshme në javët e fundit. Ato ranë ndjeshëm javën e kaluar kur Gjermania njoftoi se objektet e saj të depozitimit të gazit po mbusheshin më shpejt se sa pritej.
Megjithëse Britania e Madhe nuk mbështetet në Nord Stream 1 për gazin e saj, vendimi i Kremlinit për të shtrydhur furnizimet në Europë ka rritur koston e përgjithshme të gazit me shumicë. Çmimet në Mbretërinë e Bashkuar u rritën deri në 35% të hënën, raporton BBC.
Rritja e përgjithshme ka qenë pas rritjes së kufirit të çmimit të faturës së energjisë për konsumatorët në Angli, Uells dhe Skoci.
Ministrat europianë e kanë akuzuar Rusinë për përdorimin e furnizimeve me energji si një armë ekonomike kundër atyre që mbështesin Ukrainën.
Moska ka mohuar se po kufizon qëllimisht eksportet në prag të dimrit, duke rritur kostot për familjet dhe bizneset.
Firma shtetërore e energjisë Gazprom tha se një rrjedhje nafte në një turbinë në tubacionin Nord Stream 1 ishte pas mbylljes.
Gazprom bëri njoftimin për mbylljen e tubacionit të premten menjëherë pasi vendet e G7 ranë dakord për të kufizuar çmimin e naftës ruse në mbështetje të Ukrainës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
