Më shumë se 760 fluturime janë anuluar në aeroportin e Mynihut të shtunën. Kjo për shkak të reshjeve të dendura të dëborës dhe motit të keq, i cili ka goditur pjesën më të madhe të Gjermanisë, Austrisë dhe Zvicrës.
Në një njoftim zyrtar, aeroporti thotë se fluturimet do të anulohen deri pasditen e së dielës.
Ndërkohë, për shkak të stuhive të borës janë pezulluar edhe shërbimet e autobusëve dhe tramvajit dhe disa shërbime të trenave në Mynih.
Stacioni kryesor i trenit u mbyll plotësisht për transportin vendas, ndërsa edhe shërbimet ndërqytetëse u pezulluan në mënyrë të pjesshme duke shkaktuar kaos dhe paralizim të gjithë transportit.
Hekurudhat gjermane paralajmëruan se trafiku i trenave do të jetë i rënduar deri të hënën kjo për shkak të shtyrjes së orareve.
Në disa zona të Bavarisë jugore, banorëve iu kërkua të mos largoheshin fare nga shtëpitë e tyre, për shkak të kushteve të motit.
Vetëm në Mynih raportohet se ka rënë mbi 45 cm borë, shifra më e lartë e shënuar ndonjëherë që prej vitit 1933.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
