Boksieri irlandez ndërron jetë në moshën 28-vjeçare, një javë pasi pësoi dëmtim në ndeshje

Boksieri irlandez John Cooney është ndarë nga jeta, ka bërë të ditur promotori i tij Mark Dunlop, një javë pasi u plagos në një ndeshje në Belfast.

28-vjeçari ishte në kujdes intensiv pas humbjes së tij ndaj uellsianit Nathan Howells në Ulster Hall të shtunën e kaluar.

Ndeshja u ndërpre në raundin e nëntë dhe Cooney më pas iu nënshtrua një operacioni pasi u zbulua se kishte një hemorragji intrakraniale.

Ndeshja ishte mbrojtja e tij e parë e titullit Celtic në peshën super-pendë.

Një deklaratë tjetër u postua të shtunën mbrëma nga Dunlop në emër të familjes Cooney, duke konfirmuar se boksieri kishte vdekur pas një jave lufte për jetën e tij.

Me hidhërim të thellë duhet të njoftojmë se pas një jave beteje për jetën e tij, John Cooney fatkeqësisht ka ndërruar jetë.

Zoti dhe zonja Cooney dhe e fejuara e tij Emmaleen dëshirojnë të falënderojnë stafin në spitalin Royal Victoria të Belfast-it, të cilët kanë punuar pa u lodhur për të shpëtuar jetën e John dhe për të gjithë ata që kanë dërguar mesazhe mbështetjeje dhe lutje.

Cooney fitoi titullin me një fitore ndaj Liam Gaynor në Dublin në nëntor 2023, por kaloi një vit jashtë ringut pas një dëmtimi në dorë. Ai u kthye në tetor me një fitore ndaj Tampela Maharusi.