Presidenti i rrëzuar i Gabonit, Ali Bongo Ondimba, ka kërkuar ndihmë, disa orë pasi u vu në arrest shtëpiak nga anëtarët e gardës së tij presidenciale në një përpjekje për grusht shteti të mërkurën.
Bongo, i cili konfirmoi arrestimin e tij në një video që qarkullon në mediat sociale dhe verifikuar nga Al Jazeera, u bëri thirrje qytetarëve që të "ngrenë zërin" pas përpjekjes për grusht shtet.
Njerëzit dolën në rrugët e kryeqytetit të Gabonit, Libreville, në mbështetje të puçistëve duke festuar dhe valëvitur flamuj.
Duke u shfaqur në kanalin televiziv shtetëror Gabon 24, oficerët që orkestruan grushtin e shtetit thanë se përfaqësonin të gjitha forcat e sigurisë dhe mbrojtjes në vendin e Afrikës Qendrore.
Ata thanë gjithashtu se rezultatet e zgjedhjeve u anuluan, të gjithë kufijtë u mbyllën deri në një njoftim të dytë dhe institucionet shtetërore u shpërndanë.
Institucionet shtetërore që ata shpallën të shpërbëra përfshinin qeverinë, senatin, asamblenë kombëtare, gjykatën kushtetuese dhe organin zgjedhor.
"Në emër të popullit gabonez ... ne kemi vendosur të mbrojmë paqen duke i dhënë fund regjimit aktual," deklaroi një oficer.
Ushtarët u prezantuan si anëtarë të “Komitetit të Tranzicionit dhe Rivendosjes së Institucioneve”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
