Gjermania do të gjobisë "Facebook" me 500 mijë euro, për çdo lajm të rrem

Pas zgjedhjeve të fundit në SHBA, lajmet e rreme në rrjetin social “Facebook” janë kthyer në shqetësim për shumë shtete të botës.

E para që po planifikon që të ndërmarrë veprime për këtë situatë është Gjermania. Ligjvënësit mendojnë të ngrenë një zyrë të “Facebook” në këtë shtet, që do të merret me lajmet e rreme dhe lajmet që përdorin gjuhë urrejtje.

Sipas “Deutsche Welle”, nëse zyra lokale e “Facebook” nuk do të ketë fshirë këto lloje lajmesh brenda 24 orësh, rrjeti social do të gjobitet nga Gjermania për 500 mijë Euro për çdo artikull.

Ky shqetësim ka nisur që pas zgjedhjeve amerikane kur fitoi Donald Trump. Kreu i Facebook, Zuckerberg reagoi pas fitores së republikanit duke thënë se lajmet e rreme janë problem, por kjo është vetëm 1% e të gjithë artikujve që publikohen në këtë rrjet.