Mollët e Korçës stok, Shoqata e biznesit të vogël-Ramës: Duam zgjidhje, ose do përshkallëzojmë protestat

Shoqata e biznesit të vogël e të mesëm të Shqipërisë kërkon gjetjen e zgjedhjes për mosshitjen e mollëve të fermerëve të juglindjes së vendit.

Kjo shoqatë ka reaguar ditën e sotme duke i kërkuar ministrisë së bujqësisë, asaj së financave dhe kryeministrit të vendit gjetjen e një zgjidhje për ti ardhur në ndihmë fermerëve për shitjen e afro 15 mijë ton mollëve të pashitura.

Nënkryetari i kësaj shoqate Bujar Muço thotë dy janë mundësitë për të ardhur në ndihmë fermerëve të shesin prodhimin që ka ngelur i ruajtur në frigorifer, rritja e referencës së importit dhe rritjen e kontrollit të analizave të prodhimit që vjen nga vendet e tjera.

Muço ka bërë me dije se në qoftë se kjo situatë nuk merr zgjidhje, fermerët do të përshkallëzojnë protestat e tyre.

I gjithë ky ngërç në mosshitjen e prodhimit ka ardhur për shkak të grumbullimit me çmim të lartë nga ana e grosistëve ndërkohë që mollët që vijnë nga Serbia, Moldavia dhe Polonia janë me çmim të ulët duke bllokuar prodhimin vendas.