Gazeta “The Telegraph” raporton se forcat e policisë në Britaninë e Madhe kanë kryer fshehurazi qindra kërkime për njohjen e fytyrës duke përdorur databazën e Mbretërisë së Bashkuar me 46 milionë mbajtës të pasaportave britanike, zbulim që ka ngjallur debat në këtë vend.
Chris Philp, ministri për Policimin, vitin e kaluar u dha mundësinë oficerëve që të kenë akses databazën e pasaportave, në mënyrë që ata të mund të përdorin njohjen e fytyrës për të identifikuar të dyshuarit në të gjitha vjedhjet dhe plaçkitjet në dyqane. Një hetim nga The Telegraph dhe Liberty Investigates, megjithatë ka zbuluar se praktika ka ndodhur të paktën që nga viti 2019.
Të dhënat e marra nga Zyra e Brendshme përmes një kërkese për Lirinë e Informacionit (FOI) tregojnë se forcat kontrolluan databazën e pasaportave në Mbretërinë e Bashkuar, e cila përmban fotot e 46 milionë mbajtësve të pasaportave britanike, më shumë se 300 herë në nëntë muajt e parë të 2023, duke përdorur teknologjinë e njohjes së fytyrës.
Forcat kanë kryer gjithashtu kontrolle në databazën e emigracionit në Mbretërinë e Bashkuar, e cila mban informacione për shtetas të huaj.
Zbulimi ka ngjallur shqetësim tek deputetët dhe organizatat. Komisioneri i informacionit, tha se shqetësimi mbi implikimet e zbulimit, dhe nevoja për mbrojtjen e të dhënave, do të ngrihet në Home Office.
Zëdhënësi tha: “Zyra e Komisionerit të Informacionit është e angazhuar me Home Office për një sërë çështjesh që lidhen me teknologjinë e njohjes së fytyrës për të siguruar më mirë përdorimin e saj në përputhje me parimet e mbrojtjes së të dhënave. Tani po angazhohemi për çështjen e databazës pasaportave në kontekstin e këtij informacioni të ri.”
David Davis, ish-ministri i kabinetit, tha se nuk kishte "asnjë bazë të qartë legjislative" për përdorimin e teknologjisë së njohjes së fytyrës në Mbretërinë e Bashkuar. Ai vë në dukje se veprime të tilla nga policia cenojnë raportin mes qytetarit dhe shtetit. Sakaq, Tony Porter, ish-komisioneri i kamerave të vëzhgimit, tha se ishte "problematike" që të dhënat e mbajtësve të pasaportës po kontrolloheshin nga policia pa dijeninë ose pëlqimin e tyre paraprak se ato do të përdoreshin për një qëllim të tillë.
“Gjëja tjetër problematike është se Qeveria e ka ngritur rëndësinë e transparencës. Ata duhet ta tregojnë këtë se si dhe pse është legjitime, përndryshe ata rrezikojnë të humbasin besimin dhe besimin e publikut”, u shpreh ai.
Teknologjia e njohjes së fytyrës i lejon policisë të përdorë imazhe të marra nga burime të tilla si pamjet e CCTV ose telefonat celularë, edhe kur ato që janë të paqarta ose pjesërisht të errëta, dhe të kërkojë përputhjen e këtyre imazheve te të dyshuar të mundshëm që janë në databazë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
