Protesta e qytetarëve në Tiranë ka hyrë në ditën e saj të 30-të, me pjesëmarrësit që vijojnë të mos tërhiqen nga kërkesat e tyre dhe as të pranojnë një dialog me kryeministrin Edi Rama, të cilit i kërkojnë dorëheqje të parevokueshme dhe formimin e një qeverie teknike.
Gazetarja e MCN TV, Jonida Cakoni, në një lidhje direkte për edicionin e lajmeve, ka përshkruar situatën në terren, duke theksuar vazhdimësinë e protestave dhe shtimin e pjesëmarrjes qytetare nga dita në ditë.
Jemi vendosur në sheshin Skënderbej, ku prej një muaji qytetarët nisin grumbullimin për protestën dhe më pas marshojnë drejt Kryeministrisë. Qytetarët kanë bërë kërkesat e tyre, ku kryesorja mbetet dorëheqja e Ramës dhe krijimi i një qeverie teknike. Në këto 30 ditë, qytetarët kanë ngritur shqetësime të shumta që lidhen me emigracionin e të rinjve, shëndetësinë dhe ekonominë.
Ajo shtoi se qëndrimi i protestuesve ka mbetur i pandryshuar, ndërsa edhe reagimet nga qeveria nuk kanë munguar.
Nga ana e tij, Rama nuk ka munguar me reagimet, duke theksuar se projekti qeverisës do të vijojë. Pritet që numri i qytetarëve të rritet edhe më shumë në minutat në vijim, ndërsa marshimi drejt Kryeministrisë vijon.
Sipas gazetares, temperaturat e larta kanë sjellë një ndryshim në orarin e tubimeve, të cilat tashmë nisin pas orës 19:00 dhe zgjasin për disa orë. Ajo theksoi gjithashtu se gjatë protestave nuk kanë munguar as bllokimet e disa prej akseve kryesore të kryeqytetit, duke krijuar vështirësi në qarkullim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
