Një grup mësuesish zëvendësues hynë me forcë në studiot e televizionit shtetëror ERT në Greqi, duke ndërprerë buletinin kryesor të lajmeve. Ngjarja ndodhi menjëherë pas orës 9 të paradites së kësaj të shtune. Ndërkohë që gjatë edicionit të lajmeve në studio po flitej për një raport mbi politikën e brendshme u dëgjua një zhurmë e madhe.
Gazetari njoftoi papritmas, në mes të raportimit, se buletini i lajmeve u ndërpre për shkak të reklamave. Më pas, u transmetua buletini i motit, i regjistruar që më parë dhe të tjera reklama. Ndërsa së fundi, u transmetua një film. Përmes një videoje me rezolucion të ulët tregohet se në fakt ajo çfarë ndodhi ishte futja në studio e një grupi njerëzish, të cilët këndonin: “Njerëz, mos e mbani kokën poshtë, e vetmja rrugë është rezistenca dhe lufta”.
Mësuesit zëvendësues në Greqi po protestojnë së fundmi, duke kërkuar punë të përhershme në shkollat shtetërore. Të premten, ata u mblodhën jashtë Parlamentit dhe u përleshën me policinë, të cilët përdorën ndaj tyre gaz lotsjellës. Një protestues u tregua duke shkelur një kurorë, që kancelarja gjermane Angela Merkel kishte vendosur të premten te Varri i Ushtarit të Panjohur jashtë Parlamentit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
