Të djathtët në Britani kanë humbur thellë vendoret e kësaj jave përball laburistëve. 473 këshilltarë vendorë më pak në rang vendi dhe në disa zona kanë dalë të tretët. Brenda konservatorëve, pozitat e kryeministrit Rishi Sunak tashmë janë të rrezikuara.
Kryebashkiaku laburist i Londrës, Sadik Kan, mori mandatin e tretë në këto zgjedhje vendore në Britani. Laburistët kanë fituar bindshëm, ndërsa konservatorët kanë humbur 473 këshilltarë bashkiakë në rang kombëtar, duke sjellë përçarje brenda të djathtëve pak muaj përpara zgjedhjeve parlamentare. Në Uest Midlends, në Mançester, Liverpul dhe Uest Jorkshaiër kanë fituar laburistët.
Në disa zona, konservatorët kanë humbur edhe përball Liberal Demokratëve, duke zënë vendin e tretë, ngjarje që nuk ishte parë që nga viti 1996. Për analistët britanikë, posti i kryeministrit Rishi Sunak është në rrezik, pasi debatet kanë nisur brenda konservatorëve. Për ish-ministren e Brendshme Suela Braverman nuk është koha për të ndryshuar liderin përpara zgjedhjeve të përgjithshme.
Askush nuk duhet të humbasë kohë duke e analizuar nëse duhet të ndryshojmë liderin tonë. Kjo nuk do të japë rezultate tani. Është koha që kryeministri të fillojë nga puna. Votuesit konservatorë duan arsye për të na votuar.
Por për liderin e laburistëve, Keir Sramer, tani është koha për të shkuar në zgjedhje të përgjithshme.
Kryeministri Sunak nuk ka zgjidhje tjetër veçse të thërrasë menjëherë zgjedhjet e përgjithshme për të shmangur dëmtimin e mëtejshëm të vendit nga qeveria e tij e paralizuar dhe partia thellësisht e përçarë.
Mediet britanike kanë publikuar projeksionet nëse zgjedhjet parlamentare do të mbaheshin këtë javë dhe rezulton se laburistët marrin 34% të votave, konservatorët 27% dhe liberal demokratët 16%.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
