“Nuk po përpiqem të jem heroinë. Bëhu zëri im.” Me këto fjalë, një studente 23-vjeçare iraniane e cila përballet me dënimin me vdekje bën një apel dramatik nga burgu, duke i kërkuar publikut dhe bashkësisë ndërkombëtare që të mos e lënë rastin e saj të harrohet.
Najmeh Amin, një studente kontabiliteti, po mbahet në burgun Vakilabad të Mashhadit dhe sipas organizatës iraniane Human Rights Watch (IHRM), u dënua me vdekje më 16 shtator, pas rreth tetë muajsh në paraburgim.
Në një rast tjetër, ajo u dënua gjithashtu me 12 vjet e gjashtë muaj burg.
Dy ditë pasi u dha dënimi me vdekje, më 18 shtator, u publikua një mesazh audio i cili i atribuohej 23-vjeçares dhe që dyshohet se ishte regjistruar nga brenda burgut.
Amini prezantohet, thotë se po flet nga Burgu Qendror i Mashadit dhe përshkruan frikën e saj se mund të mos ketë kurrë mundësinë që zëri i saj të dëgjohet përsëri.
Nuk po përpiqem ta bëj veten heroinë sot. Kërkoj vetëm një gjë: të jesh zëri im. Unë jam një vajzë e pafajshme, një e re me kaq shumë shpresa dhe ëndrra.
Kam prindër që më presin, një familje që zgjohet çdo mëngjes me frikë se mos më humbasë. Nuk dua që gjurma ime e fundit të jenë disa rreshta në një zarf.
Sipas IHRM, Najmeh Amini u arrestua më 31 janar 2026, pranë Pazarit Ferdoësi në Mashhad, mes protestave antiqeveritare që kishin shpërthyer në vend.
Organizata pretendon se gjatë arrestimit të saj, ajo u rrah nga forcat e sigurisë dhe më pas u mbajt në izolim për gati tre muaj.
Ndër akuzat me të cilat dyshohet se përballet ishin “armiqësi ndaj Zotit”, “bashkëpunim me një shtet armiqësor”, duke iu referuar Izraelit, “fyerje e profetit”, “fyerje e udhëheqësit suprem” dhe konflikt me forcat e sigurisë.
IHRM ankohet se 23-vjeçarja nuk ka pasur akses në një avokat sipas zgjedhjes së saj dhe flet për abuzim fizik dhe psikologjik gjatë paraburgimit dhe marrjes në pyetje.
Në mesazhin audio, Amini u drejtohet drejtpërdrejt avokatëve, juristëve, aktivistëve dhe organizatave ndërkombëtare të të drejtave të njeriut, duke u kërkuar atyre të shqyrtojnë dosjen e saj.
“Dua vetëm drejtësi dhe mundësinë për të mbrojtur veten”, thotë ajo, ndërsa u bën thirrje organeve përkatëse të OKB-së që të hetojnë rastin e saj dhe të monitorojnë zhvillimin e tij.
Apeli i saj mbyllet me një frazë që tashmë ka filluar të përsëritet nga organizatat dhe llogaritë e të drejtave të njeriut: “Mbajeni mend emrin tim. Mund të mos jem në gjendje të flas përsëri.”
Më tej shton se, për sa kohë që është gjallë, ruan një shpresë: “Para se litari të më japë fund jetës, të shoh Iranin tim të lulëzojë dhe të jetë i lirë”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
