Zgjedhjet në Bjellorusi, Lukashenko pritet të marrë mandatin e shtatë

Bjellorusët votojnë për zgjedhjet presidenciale të vendit, me presidentin aktual Alexander Lukashenko që kërkon një mandat të shtatë në detyrë.

Votimi filloi në orën 8 të mëngjesit me orën lokale në gjithsej 5.325 qendra të votimit të hapura të cilat do të mbyllen në orën 20 në mbrëmje.

Pak më shumë se 6.9 milionë bjellorusë kanë të drejtë të votojnë në këto zgjedhje, për të cilat votimi i parakohshëm u zhvillua nga 21 deri më 25 janar.

Sipas Komisionit Qendror Zgjedhor të Bjellorusisë (CEC), 41,81 për qind e elektoratit të vendit morën pjesë në procesin e votimit të parakohshëm.

Presidenti i Bjellorusisë është një aleat i ngushtë i Vladimir Putin, madje e ka ofruar vendin e tij si pikënisje për pushtimin e Ukrainës në vitin 2022 dhe ka rënë dakord që vitin e ardhshëm të lejojë Moskën të vendosë armë taktike bërthamore në Bjellorusi.

Shtetet e Bashkuara dhe Bashkimi Evropian thanë se nuk mund të ketë zgjedhje të lira dhe të drejta sepse mediat e pavarura janë të ndaluara në Bjellorusi dhe të gjitha figurat kryesore të opozitës janë burgosur ose janë detyruar të ikin jashtë vendit.

Udhëheqësja e opozitës në mërgim Sviatlana Tsikhanouskaya tha se Lukashenko ishte duke projektuar rizgjedhjen e tij si pjesë e një “rituali për diktatorët”.

Ai përballet me katër kandidatë të tjerë, asnjëri prej të cilëve nuk ka ngritur ndonjë sfidë apo kritikë serioze. Një total prej 6.9 milionë njerëz u regjistruan për të hedhur votat e tyre.

Lukashenko përdori aparatin e tij të sigurisë për të shtypur demonstratat kundër tij, duke arrestuar dhjetëra mijëra njerëz, megjithatë ai mohon se ka të burgosur politikë.