Gjykata e Posaçme Kundër Korrupsionit dhe Krimit të Organizuar caktoi në seancën e sotme, masën e sigurisë “arrest me burg” për Flodian Plakun dhe ish-shefin e Krimeve Rezart Kuçi, të cilët u arrestuan të shtunën.
Vendimi u komunikua pas kërkesës së Prokurorisë së Posaçme, e cila i akuzon dy të ndaluarit si pjesë të një grupi kriminal që dyshohet se drejtohet nga Inez Hajrulla.
Sipas hetimeve paraprake, grupi dyshohet të jetë i përfshirë në aktivitete të ndryshme kriminale, ndërsa autoritetet vijojnë punën për zbardhjen e plotë të rolit të secilit prej personave të përfshirë.
Ndërkohë, Inez Hajrulla është shpallur në kërkim. Ai ka qenë disa herë objekt i atentateve, të cilave ka arritur t’u shpëtojë. Policia ka zhvilluar kontrolle të shumta në disa baza ku dyshohej se ai qëndronte, por deri më tani nuk është bërë e mundur kapja e tij.
Gjatë operacionit të së shtunës u arrestuan dy të dyshuarit dhe nga hetimet e SPAK u zbardhën dy atentate mafioze të ndodhura pesë vite më parë.
Bëhet fjalë për vrasjen e Gentjan Qarrit më 6 shkurt dhe ekzekutimin e Bledar Birçajt më 10 mars të vitit 2021.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
