Unioni i Gjyqtarëve ankimoi të premten në Gjykatë Kushtetuese ligjin “Për statusin e gjyqtarëve dhe prokurorëve”, me kërkesën për pezullimin e tij, pasi është antikushtetues.
Përfaqësuesit e Unionit, pas depozitimit në Gjykatë të kërkesës ankimore parashtruan argumentet pse janë kundër këtij ligji, një nga 7 ligjet e paketës mbështetëse për zbatimin e reformës në drejtësi.
“Kërkesa jonë për pezullimin e ligjit konsiston në faktin se përmes tij cënohet parimi i funksionimit të vazhdimësisë së institucioneve të organeve kushtetuese si Këshilli i Lartë i Drejtësisë. Po ashtu, ligji cënon dhe disa parime kushtetuese si atë të sigurisë juridike, parimin e pavarësisë së pushtetit, prezumimin e pafajësisë, të barazisë para ligjit, etj”, tha përfaqësuesi i Unionit.
Pas ligjit të Vettingut, ky është ligji i dytë i reformës në drejtësi që komuniteti i gjyqtarëve ankimon në Kushtetuese.
Ligji ‘Për statusin e gjyqtarëve dhe prokurorëve’, i miratuar me 6 tetor ne parlament, përmban një sërë risish që lidhen me promovimin, lëvizjen dhe pagesat e tyre. Me ligjin e ri gjyqtarë e prokurorë do të jenë të gjithë ata që do te kalojnë procesin e verifikimit të figurës dhe do të kenë një sërë garancish në pozicionin e tyre, për të qënë profesionistë, të pa ndikuar nga politika apo nga grupet kriminale.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
