Parlamenti britanik ka hedhur poshtë marrëveshjen e kryeministres Theresa May me Brukselin për shkëputjen e Britanisë me Bashkimin Europian. Me 432 vota kundër dhe 202 pro, deputetët britanikë kanë “ngelur në klasë” marrëveshjen e kryeministres May, e cila nuk ka as mbështetjen e partisë së saj, pasi 118 prej deputetëve që votuan kundër janë konservatorë.
Lideri i laburistëve, Jeremy Corbyn, ka paraqitur kërkesën për një mocion mosbesimi për qeverinë “May”. Pritet që kjo të diskutohet ditën e sotme.
Ndërkohë, kreu i Parlamentit Europian, Antonio Tajani, i mbyll Britanisë çdo mundësi rinegocimi për marrëveshjen. “Nuk besoj se ka mbetur gjë për të ndryshuar. Britanisë së Madhe i është dhënë çfarë ka kërkuar, kur ishte pjesë integrale e Bashkimit Europian. I kemi lënë hapësirat që mund t’i liheshin, pa cenuar interesat e qytetarëve europianë që jetojnë në Britani, në rast të një Brexit-i të vështirë , apo daljes nga BE-ja pa një marrëveshje me Brukselin”, ka thënë Tajani.
Mosaprovimi i marrëveshjes nga Parlamenti britanik lë të hapur mundësinë e një referendumi të dytë. Megjithatë, May e sheh këtë mundësi si një instrument ndarjeje për Britaninë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
