Arjana Muçaj, psikologe dhe pedagoge tha në “Mcn Informacion” se mungesa e vetëvlerësimit dhe vetëbesimit është një faktor në rastet e vetëvrasjes së të rinjve.
Muçaj vuri në dukje se mësuesit kujdestarë në shkolla kanë një rol parësor, pasi i njohin mirë nxënësit dhe problematikat në familjet e tyre.
“Nisur nga faktorët social-ekonomikë rrjedhin faktorët e tjerë. Kemi faktorët e shëndetit mendor, që i kemi elementët e parë. Tashmë u është dhënë një rëndësi e madhe. Kemi problemet në familje, si dhuna, problemet nga efektet e lëndës narkotike, të rinj që vuajnë nga depresioni dhe stresi. Kemi nivel të ulët jetese, s’kemi minimalen për frymë, varfëria në popullsi që sjell edhe pasojat e tjera. Shkolla është institucioni bazë që shikon edhe ndryshimin e sjelljeve të fëmijëve, si komunikon, çfarë modele sjelljesh ka. Detyrën parësore e kanë mësuesit kujdestarë, që janë në rolin e një prindi. Një mësues i njeh shumë mirë nxënësit, njeh historikun e familjes, problematikat. Një mësues duhet të tregohet më i kujdesshëm me mënyrën si duhet trajtuar ky fëmijë. Rastet e vetëvrasjes vijnë prej asaj që ulet vetëvlerësimi, ulet vetëbesimi”.
Muçaj vë në dukje se vetmia është elementi kyç që e çon një njeri drejt aktit të vetëflijimit. Po ashtu ajo shtoi se prindërit nuk duhet t'i krahasojnë fëmijët, pasi ata janë të ndryshëm, dhe ju ulet vetëvlerësimi.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
